BAKI, AzerVoice
Banqladeşdə təyyarə məktəb ərazisinə çırpılıb. Ölənlər və yaralananlar var.
AzerVoice xəbər verir ki, Banqladeşdə dəhşətli aviasiya qəzası baş verib. Banqladeş Hərbi Hava Qüvvələrinə məxsus F-7 hərbi təlim təyyarəsi dünən paytaxt Dəkkədəki məktəb ərazisinə düşüb.
Səhiyyə Nazirliyindən verilən açıqlamaya görə, təlim uçuşu zamanı təyyarənin Milestone School ərazisinə çırpılması nəticəsində 25-i uşaq olmaqla 27 nəfər həlak olub, 88 nəfər isə xəstəxanalarda müalicə olunur.
Hərbi rəsmilərin bildirdiyinə görə, dünən yerli vaxtla saat 13:06 radələrində Dəkkədəki Kurmitola aviabazasından havaya qalxdıqdan az sonra adi təlim missiyası zamanı qəzaya uğrayan təyyarədə mexaniki nasazlıq yaranıb.
Banqladeş hökuməti hadisədən sonra milli matəm günü elan edib və bütün ölkə boyu bayraqlar yarıya endirilib.
Qeyd edək ki, F-7 BGI Çinin Chengdu J-7/F-7 ailə təyyarələrinin ən son və ən təkmil versiyasıdır. Banqladeş bu təyyarələrdən 16-nı sifariş edib, çatdırılma 2013-cü ildə tamamlanıb.
