BAKI, AzerVoice
Azərbaycan təsviri sənətində 1960-cı illərdə formalaşmış nonkonformist cərəyanın qorunması və beynəlxalq səviyyədə tanıdılması məqsədilə mühüm mədəni layihə uğurla başa çatdırılıb.
AzerVoice xəbər verir ki, bp şirkəti Azəri-Çıraq-Günəşli, Bakı-Tbilisi-Ceyhan, Şahdəniz və Cənubi Qafqaz Boru Kəməri layihələrindəki tərəfdaşları — SOCAR, TPAO, LUKOIL, SGC, NICO, MOL, INPEX, ExxonMobil, ITOCHU, ONGC Videsh, Eni, MVM və TotalEnergies adından Azərbaycan Milli İncəsənət Muzeyində nonkonformist rəssamların əsərləri üçün ayrılmış xüsusi sərgi zallarının təmiri və modernləşdirilməsini maliyyələşdirib.
Layihə çərçivəsində muzey zallarının estetik və funksional imkanları əhəmiyyətli dərəcədə təkmilləşdirilib, beynəlxalq muzey standartlarına cavab verən müasir işıqlandırma sistemləri quraşdırılıb, divar və səthlər müvafiq şəkildə hazırlanıb. Görülən işlər nonkonformist sənət nümunələrinin optimal texniki və vizual şəraitdə nümayişi və mühafizəsini təmin edir.
Məlumata görə, layihə çərçivəsində 800 kvadratmetr divar, 400 kvadratmetr tavan və 330 kvadratmetr döşəmə sahəsi təmir edilib, ən azı 150 sənət əsəri üçün qabaqcıl işıqlandırma sistemləri quraşdırılıb, muzey standartlarına uyğun 150 ədəd yeni taxta çərçivə hazırlanıb.
Qeyd olunur ki, XX əsr Azərbaycan nonkonformist rəssamlarının yaradıcılığı Muzey kolleksiyasının mühüm hissəsini təşkil edir. 1960–1980-ci illərdə formalaşmış bu cərəyan sovet dövrünün sosialist realizminə qarşı alternativ estetik yanaşma kimi meydana çıxıb və Abşeron Rəssamlıq Məktəbinin inkişafında mühüm rol oynayıb. Bu cərəyanın aparıcı nümayəndələri arasında Mircavad Mircavadov, Əşrəf Murad, Tofiq Cavadov, Rasim Babayev, Qorxmaz Əfəndiyev, Kamal Əhməd və avanqard heykəltəraş Fazil Nəcəfov xüsusi yer tutur.
Layihənin təqdimat mərasimində çıxış edən bp-nin Azərbaycan, Gürcüstan və Türkiyə üzrə regional prezidenti Cio Kristofoli bildirib ki, yenilənmiş zallar Azərbaycanın nonkonformist təsviri sənət irsinin daha dolğun, estetik və beynəlxalq səviyyədə təqdim olunmasına imkan yaradır. Onun sözlərinə görə, layihə bu irsin həm ölkə daxilində, həm də beynəlxalq miqyasda layiq olduğu yüksək dəyərin qazanılmasına xidmət edəcək.
Ümumi dəyəri 358 089 manat təşkil edən layihə “Greentech Solutions” MMC tərəfindən icra olunub.
