BAKI, AzerVoice
ABŞ İmmiqrasiya və Gömrük Mühafizəsi (ICE), qeyri-qanuni miqrantların saxlanması və deportasiyası imkanlarını genişləndirmək məqsədilə böyük çadır düşərgələri inşa edərək onları müvəqqəti saxlama mərkəzi kimi istifadə etməyi planlaşdırır.
AzerVoice “The Wall Street Journal” qəzetinin əldə etdiyi sənədlərə istinadən xəbər verir ki, ABŞ Prezident Donald Tramp administrasiyası qeyri-qanuni miqrantların sürətlə deportasiyasına əsas maneə kimi mövcud müvəqqəti saxlama mərkəzlərində yer çatışmazlığını görür.
Nəşr yazır ki, Trampın bu ilin yanvarında Ağ Evə qayıtdığı vaxt ICE-in cəmi 40 min çarpayı yeri var idi. Qurum cari ilin sonuna qədər bu rəqəmi 100 minə çatdırmağı hədəfləyir. Hal-hazırda idarənin diqqət mərkəzində İndiana, Kolorado, Nyu-Cersi və Texas daxil olmaqla bir sıra ştatlarda 9 yeni layihə yer alır.
ABŞ hakimiyyəti yaxın gələcəkdə hərbi bazaların və mövcud miqrant saxlama mərkəzlərinin ərazilərində minlərlə çadır qurmağı planlaşdırır. Qəzetin yazdığına gprə, çadır düşərgələri ideyası artıq Tramp administrasiyasında ziddiyyətlərə səbəb olub. Bəzi vəzifəli şəxslər miqrantların iri və mərkəzləşdirilmiş mərkəzlərdə saxlanmasının daha səmərəli olduğunu düşünsə də, digərləri bu cür müvəqqəti düşərgələrdə uzun müddətli saxlanmanın xüsusilə daşqın və qasırğa riski olan bölgələrdə humanitar fəlakətlə nəticələnə biləcəyini bildirirlər.
Qeyd edək ki, hazırda ICE ABŞ ərazisində 200-dən çox müvəqqəti miqrant saxlama mərkəzini idarə edir. 4 iyul tarixində Tramp bu məqsədlə ICE-in imkanlarının genişləndirilməsi üçün 45 milyard dollar ayrılmasını nəzərdə tutan dövlət xərcləri haqqında qanun imzalayıb.
Əlavə edək ki, Donald Tramp dəfələrlə miqrasiya siyasətinin sərtləşdirilməsinin tərəfdarı olduğunu bəyan edib. O, andiçmə mərasimindən dərhal sonra ABŞ-Meksika sərhədində fövqəladə vəziyyət rejiminin tətbiq edilməsi barədə fərman imzalayıb. Tramp, həmçinin ABŞ tarixində ən geniş deportasiya əməliyyatını həyata keçirməyi planlaşdırdığını və bu çərçivədə 1 milyon qeyri-qanuni miqrantın ölkədən çıxarılacağını bildirib.
