BAKI, AzerVoice
Almaniya kansleri Fridrix Merts, Ukraynaya yaxın günlərdə yeni və əhəmiyyətli hərbi dəstək göndəriləcəyini açıqlayıb.
AzerVoice xəbər verir ki, Merts bu barədə verdiyi bəyanatda Ukraynadakı müharibənin təkcə region üçün deyil, bütövlükdə Avropa üçün ciddi təhlükə yaratdığını vurğulayıb.
O bildirib ki, Almaniya Böyük Britaniya ilə birlikdə hərbi sahədə sıx əməkdaşlıq edir və yeni yardım paketi də bu əməkdaşlığın bir hissəsidir.
Kansler qeyd edib ki, Almaniya və Britaniya “Typhoon” döyüş təyyarələri və “Boxer” zirehli texnikalarının birgə istehsalı üzrə əməkdaşlıq edir.
Həmçinin, 2 min kilometr mənzilə malik yeni raket layihəsi üzərində işlər aparılır və bu texnologiyanın Ukraynanın müdafiəsində də rol oynayacağı gözlənilir.
Merts əlavə edib ki, ABŞ Prezidenti Donald Tramp ilə Ukrayna və ticarət məsələləri üzrə koordinasiyalı danışıqlar davam edir.
“Biz Trampla hər həftə əlaqə saxlayırıq. Ukraynaya yardım və Avropa təhlükəsizliyi əsas gündəm mövzularımızdır” – deyə kansler vurğulayıb.
Almaniya kansleri eyni zamanda Avropanın uzun illər ABŞ-ın müdafiəsində “sərnişin rolunu” oynadığını etiraf edib və Avropanın artıq öz təhlükəsizliyi üçün daha çox məsuliyyət götürməli olduğunu bildirib.
