BAKI, AzerVoice

ABŞ-ın prezidenti Donald Tramp, İsrail Baş naziri Benyamin Netanyahunun korrupsiya ittihamları ilə üzləşdiyi məhkəmə işininin dərhal ləğv edilməsini və ya Netanyahunun əfv olunmasını tələb edib.

AzerVoice xəbər verir ki, Tramp bu fikirləri Truth Social platformasında paylaşdığı açıqlamada bildirib.

O qeyd edib ki, Netanyahu ilə birlikdə “cəhnnəmi yaşayıblar” və İran kimi İsrailin “əzəli düşməninə” qarşı böyük uğurlar əldə ediblər. Onun sözlərinə görə, onlar “İsrailin sağ qalması üçün birlikdə mübarizə aparıblar”.

“Bu məhkəmə işi dərhal dayandırılmalı və ya dövlət üçün bu qədər fədakarlıq etmiş bir qəhrəman əfv olunmalıdır”- deyə Tramp bildirib.

Tramp həmçinin bildirib ki, Netanyahu ilə olduğu qədər heç kimlə yaxşı işləməyib. O, İsrailin bu günə qədər ABŞ tərəfindən xilas edildiyini və indi də eyni ölkənin Netanyahuya kömək edəcəyini vurğulayıb.

Xatırladaq ki, Benyamin Netanyahuya qarşı korrupsiya, rüşvət və vəzifədən sui-istifadə ittihamları ilə açılmış məhkəmə prosesi davam edir. Məhkəmənin növbəti iclası yaxın günlərdə baş tutacaq.