BAKI, AzerVoice

Alyaska sahillərində 800 elektrik avtomobili daşıyan gəmidə yanğın baş verib, Litium-ion batareyaların partlama riski var.

AzerVoice xəbər verir ki, Alyaska sahillərində 3000-dən çox avtomobil, o cümlədən 800 elektrik avtomobili daşıyan "Morning Midas" adlı yük gəmisində yanğın baş verib.

Litium-ion batareyaların partlama ehtimalı səbəbindən ABŞ Sahil Mühafizəsi yanğının söndürülməsinə dərhal müdaxilə etməyib və vəziyyəti təhlükəsiz məsafədən müşahidə edir.

Yanğın çərşənbə axşamı günortadan sonra, Ankoric şəhərindən təxminən 1200 mil aralıda başlayıb. Gəmini idarə edən Zodiac Maritime şirkəti ekipajın yanğına nəzarət edə bilmədiyini və 15 dəqiqə sonra təcili siqnal verdiyini açıqlayıb. 22 nəfərlik heyət xilasedici qayığa minərək gəmini tərk edib və yaxınlıqdakı ticarət gəmisi tərəfindən xilas edilib.

Sahil Mühafizəsi hadisənin səbəbləri ilə bağlı araşdırma aparılacağını bildirib. Qurumun sözçüsü, elektrikli avtomobillərin litium-ion batareyalarının yüksək istilik nəticəsində alovlana biləcəyini və buna görə də yanğının söndürülməsinin son dərəcə riskli olduğunu qeyd edib.

Qeyd edək ki, “Morning Midas” yük gəmisi 800 elektrik avtomobil də daxil olmaqla 3000-dən çox nəqliyyat vasitəsini Meksikanın Lazaro Kardenas şəhərinə aparırdı. Gəmi mayın 26-da Çinin Yantai şəhərindən yola düşüb və Şanxay ilə Nanşada dayanıb. Bu şəhərlər Çinin elektrikli avtomobil ixracı üzrə əsas mərkəzlərindən hesab olunur.