BAKI, AzerVoice
Banqladeşdə fəaliyyət göstərən müvəqqəti hökumət, vəzifələrini yerinə yetirmədən işini dayandırmayacaq.
AzerVoice xəbər verir ki, bu barədə ölkənin Nazirlər Kabineti müşavirlərindən Vahiduddin Mahmud fövqəladə iclasdan sonra bildirib.
“Biz işimizi yerinə yetirmədən heç yerə getməyəcəyik” – deyə, o qeyd edib.
Daha əvvəl Banqladeş müvəqqəti hökumətinin başçısı Məhəmməd Yunusun, ölkədəki siyasi qüvvələrin seçkilərin keçirilməsi məsələsində razılığa gələ bilməməsi səbəbilə istefa verməyi nəzərdən keçirdiyi məlum olmuşdu.
Mahmudun sözlərinə görə, Yunus istefa verəcəyini deməyib.
“O dedi ki, bizə həvalə olunan işin məsuliyyətini nəzərə aldıqda, qarşımızda bir çox maneə var. Lakin biz bütün bu maneələri aşacağıq” – deyə, o bildirib.
Fövqəladə iclasın yekununda müvəqqəti hökumət tərəfindən yayımlanan bəyanatda qeyd olunub ki, hökumət öz vəzifələrini yerinə yetirməyə davam edir.
“Lakin əgər məğlub olan qüvvələrin təhriki və ya xarici sui-qəsd nəticəsində bu vəzifələrin yerinə yetirilməsi mümkünsüz olarsa, hökumət bütün səbəbləri ictimaiyyətə açıqlayacaq və daha sonra xalqla birlikdə lazımi addımlar atacaq” – deyə, bəyanatda bildirilib.
Xatırladaq ki, keçən il avqustun 5-də kütləvi anti-hökumət etirazları fonunda Banqladeşin baş naziri Şeyx Həsina istefa verərək Hindistana getmişdi. Etirazlarda yüksək işsizlik və gələcək perspektivlərin olmamasından narazı olan tələbələr iştirak etmişdi. İyul və avqust aylarında Banqladeşin müxtəlif şəhərlərində baş verən iğtişaşlar nəticəsində təxminən min 400 nəfər həlak olmuşdu. Avqustun 8-də ölkədə Məhəmməd Yunusun rəhbərliyi ilə müvəqqəti hökumət and içmişdi.
