BAKI, AzerVoice
İranda qum fırtınası məktəblərin bağlanmasına səbəb olub.
AzerVoice xəbər verir ki, İranın qərbində baş verən qum fırtınaları səbəbindən bir neçə əyalətdə məktəblər və dövlət qurumları fəaliyyətini dayandırıb.
İRNA agentliyinin yaydığı məlumata əsasən, fövqəladə hallar komitələri və böhran idarəetmə mərkəzləri havanın çirklənməsi və görünüş məsafəsinin azalması səbəbilə Qərbi Azərbaycan, Kürdüstan və Zəncan əyalətlərində bu gün məktəblərin bağlanmasına qərar verib.
Eyni zamanda, Şərqi Azərbaycan vilayətində də oxşar tədbirlər görülüb. Təbriz şəhərində isə vəziyyətin daha da ciddiləşməsi səbəbindən yalnız məktəblər deyil, həm də bütün dövlət idarələri və banklar bağlanıb.
Qeyd edək ki, İran Meteorologiya Təşkilatının verdiyi açıqlamaya əsasən, qum fırtınasının bu gün ərzində Əlborz əyaləti və paytaxt Tehran ərazisinə də çatacağı gözlənilir.