BAKI, AzerVoice
Fransa xarici işlər naziri Jan Noel Barro bu gün Hollandiya tərəfindən Avropa İttifaqı (Aİ) ilə İsrail arasında imzalanmış tərəfdaşlıq sazişinin yenidən nəzərdən keçirilməsi çağırışını qanuni və əsaslı hesab edib.
AzerVoice xəbər verir ki, o, Avropa Komissiyasını (AK) bu məsələni araşdırmağa çağırıb.
“Hollandiya Avropa Komissiyasına müraciət edərək İsrail hökumətinin tərəfdaşlıq sazişinin ikinci maddəsinə əməl edib-etmədiyini araşdırmağı istədi” - deyə, Barro bildirib.
Sazişə görə, Avropa İttifaqı ilə İsrail arasındakı münasibətlər insan hüquqlarına və demokratik prinsiplərə hörmət əsasında qurulmalıdır.
Hollandiya xarici işlər naziri Kaspar Fildkamp isə Aİ ilə İsrail arasında imzalanmış sazişin 2-ci maddəsinin pozulması ehtimalı ilə bağlı rəsmi məktub göndərərək onun təcili şəkildə araşdırılmasını istəyib.
Fransa hökumətinin bu sazişə qarşı çıxıb-çıxmadığına dair sualı Barro belə cavablandırıb:
“Gəlin əvvəlcə Avropa Komissiyasının İsrailin bu maddəyə nə dərəcədə əməl etdiyinə dair aparacağı araşdırmanın nəticələrini gözləyək.”
Nazir həmçinin Qəzzadakı humanitar vəziyyətə diqqət çəkib.
“Düşünürəm ki, gerçəklikləri sözlərlə ifadə etməyə ehtiyac var. Fakt budur ki, Qəzzadakı fələstinlilər aclıqdan, susuzluqdan əziyyət çəkirlər və hər şeydən məhrumdurlar. Qəzza bölgəsi hazırda aclıq və fəlakət səbəbindən xaosun və dağılmanın astanasındadır” - deyə, o qeyd edib.
“Düşünürəm ki, bunu artıq hamı anlayır. Hətta yəhudi cəmiyyətinin içindən də bu mənasız mövqedən təsirlənmiş səslər eşidirik – bu mövqe İsrail hökumətinə aiddir. Bu məsələdə səsimizi yüksəltməklə israillilərin mövqeyinə təsir edə biləcəyimizə ümid etmək mümkündür” - deyə, o əlavə edib.
