BAKI, AzerVoice
İranın nüvə proqramı üzrə hər hansı bir razılaşma Tehranı nüvə silahı istehsal etmək imkanından məhrum etməlidir.
AzerVoice xəbər verir ki, bu fikirlər İsrail baş naziri Benyamin Netanyahunun verdiyi açıqlamada yer alıb.
Baş nazirin sözlərinə görə, İranın hələ də nüvə silahına malik olmamasının səbəbi odur ki, Netanyahu rəhbərliyi altında İsrailin bir neçə hökuməti illər boyu davamlı tədbirlər görüb və bununla da Tehranı bu sahədə təxminən 10 il geriyə atıb.
"O ki qaldı, biz [İsrail] ABŞ-la sıx təmasdayıq. Mən dəfələrlə demişəm: bir yol və ya başqa, İranın nüvə silahı olmayacaq. Bunun yollarından biri də, İranın nüvə infrastrukturunu dağıdacaq bir razılaşmaya nail olmaqdır" – deyə, Netanyahu vurğulayıb.
O əlavə edib ki, İranla əldə ediləcək razılaşmada Tehran tərəfindən ballistik raketlərin hazırlanmasının qarşısını alacaq maddə də olmalıdır.
Nəzərinizə çatdıraq ki, ABŞ və Tehran arasında İranın nüvə proqramı üzrə danışıqların növbəti mərhələsi yaxın iki həftə ərzində Avropa ölkələrindən birində, Omanın vasitəçiliyi ilə keçiriləcək.
