BAKI,AzerVoice

Səudiyyə Ərəbistanı çərşənbə günü İsrailin Suriyaya endirdiyi qınayıb.

AzerVoice xəbər verir ki, krallığın Suriya, onun hökuməti və xalqı ilə həmrəy olduğu bildirilib və beynəlxalq ictimaiyyətin İsrailin regionda təhlükəsizliyi və sabitliyi pozan hərəkətlərini dayandırmaq və münaqişənin genişlənməsinin qarşısını almaq üçün öz məsuliyyətini yerinə yetirməli olduğu vurğulanıb.

Suriyanın sabiq prezidenti Bəşər Əsədin devrilməsindən sonra İsrail mütəmadi olaraq Suriyadakı hərbi obyektlərə hava zərbələri endirib və İsrail qüvvələri İsrailin işğal etdiyi Qolan təpələri ilə həmsərhəd olan Suriyanın cənub ərazilərinə daxil olub. Onlar, təhlükəsizliklə bağlı narahatlıqları əsas gətirərək, həmin ərazilərdə qeyri-müəyyən müddətə qalmaq niyyətində olduqlarını açıq şəkildə bildiriblər.

İsrail qırıcıları çərşənbə axşamı gecə Suriyanın paytaxtının cənubundakı bir şəhəri və Daraa əyalətini bombalayıb.

İsrail ordusu daha sonra verdiyi açıqlamada Suriyanın cənubundakı hərbi hədəfləri, o cümlədən qərargahları və silah-sursat saxlanılan məntəqələri vurduğunu bildirib.

Bombardman, Suriyanın İsrailin cənuba müdaxiləsini pisləməsindən və onun geri çəkilməsini tələb etməsindən bir neçə saat sonra baş verib. Bu tələb milli sammitin yekun bəyanatında əks olunub.

İsrailin baş naziri Benyamin Netanyahu bazar günü bildirib ki, İsrail Suriyanın yeni ordusunun "Dəməşqin cənubuna daxil olmasına" icazə verməyəcək.