Bakı. AzerVoice:
Ümumdünya Səhiyyə Təşkilatının (ÜST) baş direktoru Tedros Adhanom Ghebreyesus İsrail ordusunun Rafahdakı köçkün fələstinlilər üçün düşərgəyə hücumunu pisləyib.
AzerVoice xəbər verir ki, Ghebreyesus bu barədə X sosial media hesabında paylaşım edib.
“Hücum zamanı yaralananlar müalicə olunmaq üçün Rəfahdakı digər səhra xəstəxanalarına, eləcə də ÜST tərəfindən dəstəklənən və artıq tam dolu olan travma stabilizasiya məntəqəsinə köçürülüb. Mayın 6-dan etibarən Rəfah Sərhəd Qapısının bağlanması, yanacaq qıtlığı, Qəzzaya humanitar yardımların daxil olması və paylanmasındakı problemlər, eləcə də tez-tez gecikmələr və yardım missiyalarının rədd edilməsi sağlamlıq xidmətlərinə çıxışı da məhdudlaşdırır”, - deyə o vurğulayıb.
Qəzzadakı xəstəxanaların yalnız 1/3-nin qismən işlək olduğunu vurğulayan Ghebreyesus, kifayət qədər material, avadanlıq, yanacaq və personalın olmaması səbəbindən ehtiyacları qarşılamaqda çətinlik çəkdiklərini qeyd edib.
O, həmçinin, Qəzzada atəşkəs çağırışını yeniləyib.
Qeyd edək ki, mayın 7-də İsrail ordusu Qəzzanın Rəfah bölgəsinə qurudan hücum edərək Misirlə sərhəd qapısının Qəzza tərəfini ələ keçirdiyini açıqlayıb.
Beynəlxalq Ədalət Məhkəməsinin qərarına baxmayaraq, İsrail mayın 26-da Rafahda məcburi köçkün fələstinlilərin çadırlarını bombalayıb və 23-ü qadın, uşaq və qoca olmaqla ən azı 45 fələstinlinin həyatını itirib, 249 fələstinli isə yaralanıb.
