Türkiyənin Daxili İşlər Naziri Ali Yerlikaya İstanbulda aparılan iki ayrı istintaqla bağlı açıqlama verib.

AzerVoice xəbər verir ki, Nazir Yerlikaya bildirib ki, İstanbul Böyükşəhər Bələdiyyə Başçısı Əkrəm İmamoğlunun da daxil olduğu 106 nəfərin saxlanılması qərarından sonra sosial mediada "xalqı kin və düşmənçiliyə təhrik" və "cinayətə sövq etmə" ittihamları ilə provokativ paylaşımlar edildiyi müəyyən olunub.

Bu çərçivədə, 62-si xaricdə olmaqla, ümumilikdə 261 şübhəli hesab idarəçisi müəyyən edilib. Kiber Cinayətlərlə Mübarizə İdarəsi və Təhlükəsizlik İdarəsinin koordinasiyalı əməliyyatları nəticəsində 37 şübhəli saxlanılıb, digər şübhəlilərin tutulması istiqamətində işlər davam etdirilir.

Daxili İşlər Nazirliyinin məlumatına görə, sosial media platforması Twitter (X) üzərində bu mövzuda 20 mart 2025-ci il saat 06:00-a qədər 18 milyon 647 min 269 paylaşım edilib. Paylaşımların 66%-nin real adlarla açılmış hesablar, 34%-nin isə bot hesablar tərəfindən edildiyi müəyyən olunub.

Qeyd edək ki, İstanbul Böyükşəhər Bələdiyyə Başçısı Əkrəm İmamoğlu, İstanbul Respublika Baş Prokurorluğu tərəfindən aparılan istintaq çərçivəsində saxlanılıb. Məlumata görə, İmamoğlu ilə yanaşı, ümumilikdə 106 nəfər barəsində də eyni qərar çıxarılıb.

İstanbul Böyükşəhər Bələdiyyəsinin rəhbərliyi və bəzi yüksək vəzifəli şəxslərinin də daxil olduğu bu istintaqın detalları hələ tam açıqlanmasa da, onların müxtəlif ittihamlarla cinayət məsuliyyətinə cəlb edildiyi bildirilir. Rəsmi mənbələrdən verilən ilkin məlumatlara əsasən, istintaq çərçivəsində korrupsiya, vəzifədən sui-istifadə və digər qanun pozuntuları araşdırılır.

Əkrəm İmamoğlunun saxlanılması ölkədə və beynəlxalq ictimaiyyətdə böyük rezonans doğurub. Onun tərəfdarları bu hadisənin siyasi motivli olduğunu iddia edərək, sosial media və müxtəlif platformalar vasitəsilə etirazlarını bildiriblər.

Bu arada, Daxili İşlər Naziri Ali Yerlikaya sosial mediada yayılan provokativ paylaşımlar səbəbindən 261 şübhəli hesabın müəyyən edildiyini, 37 nəfərin saxlanıldığını açıqlayıb.

İstanbul Böyükşəhər Bələdiyyəsi isə hələlik hadisə ilə bağlı rəsmi açıqlama yaymayıb. İmamoğlunun hüquq komandası onun müdafiəsi üçün prosesin detalları ilə bağlı yaxın günlərdə bəyanat verəcəyini bildirib.

İstintaq çərçivəsində prosesin necə davam edəcəyi və İmamoğlunun hüquqi statusunun necə dəyişəcəyi ilə bağlı rəsmi orqanların əlavə açıqlama verməsi gözlənilir.