BAKI, AzerVoice

Süveyş körfəzində qazma gəmisinin batması nəticəsində 4 nəfər ölüb, 22 nəfər yaralanıb.

AzerVoice xəbər verir ki, Misirin şərqində yerləşən Süveyş körfəzində “Adam Marine 12” adlı qazma gəmisinin batması faciəyə səbəb olub.

Rəsmi məlumatlara görə, qəza nəticəsində 4 nəfər həlak olub, 22 nəfər isə yaralanıb.

Misir Neft Nazirliyi hadisənin Cəbəl-Zeyt bölgəsində baş verdiyini təsdiqləyib. Qəzanın ardından neft və mineral sərvətlər naziri Kərim Bədəvi və əmək naziri Məhəmməd Cübran fövqəladə vəziyyəti qiymətləndirmək və xilasetmə işlərinə nəzarət etmək üçün hadisə yerinə yollanıblar.

Misir Səhiyyə Nazirliyindən verilən açıqlamada qeyd olunub ki, hadisədən dərhal sonra bölgəyə 20 təcili yardım maşını göndərilib. Yaralıların bir hissəsi El-Qouna hava limanına daşınıb. Qırmızı Dəniz Sağlamlıq Müdirliyi və bütün xəstəxanalar fövqəladə vəziyyətə keçirilib.

Qırmızı dəniz vilayətinin valisi Əmr Hənəfi isə 3 nəfərin hələ də itkin düşdüyünü, axtarış-xilasetmə əməliyyatlarının davam etdiyini bildirib. Hadisənin gəminin Əşrəfiya platforması yaxınlığında yeni sahəyə çəkilməsi zamanı baş verdiyi qeyd olunur.

Qeyd edək ki, qəzanın səbəbləri ilə bağlı araşdırmalar aparılır və aidiyyəti qurumlar vəziyyəti yaxından izləyir.