BAKI,AzerVoice, Nailə Babazadə

Avropa İttifaqı (Aİ), Birləşmiş Ərəb Əmirlikləri (BƏƏ) ilə Strateji Tərəfdaşlıq Müqaviləsi üzrə danışıqlara başladığını açıqlayıb.

AzerVoice xəbər verir ki, BƏƏ-də rəsmi səfərdə olan Aİ Komissiyasının Aralıq dənizi üzrə üzvü Dubravka Suica bu barədə ABŞ mərkəzli sosial media platformasında paylaşım edib.

“Bugün Aİ-BƏƏ münasibətlərində mühüm bir dönüş nöqtəsini qeyd edirik. Strateji Tərəfdaşlıq Müqaviləsi üçün danışıqlara başlamaqdan və bunu BƏƏ Siyasi İşlər üzrə Nazir Müavini Lana Nuseybe ilə açıqlamaqdan böyük şərəf duyuruq.” - deyə Suica qeyd edib.

O, müqavilənin tədqiqat və innovasiya, enerji, rəqəmsal sahələr, təhlükəsizlik, əlaqə və insan yönümlü əməkdaşlıq kimi əsas sahələrdə əməkdaşlığı dərinləşdirəcəyini və genişləndirəcəyini vurğulayıb.

“Modern, geniş və iddialı bir çərçivə yaratmağa sadiqik.”

Aİ Komissiyası sözçüsü Gijom Mersiye isə mətbuat konfransında bildirib ki, bu addım münasibətləri növbəti səviyyəyə çıxarmağı hədəfləyir.

Mersiye BƏƏ-nin Sudandakı münaqişədəki rolu ilə bağlı iddiaların müzakirə olunub-olunmamasına dair sualı belə cavablandırıb.

“Xüsusilə vurğulamaq istəyirəm ki, bu strateji tərəfdaşlığın təmin etdiyi əlavə dəyər, tərəfdaş ölkələrlə inkişaf etmiş siyasi dialoqu gücləndirməkdir. Bu əsas prinsipdir və bu kanal vasitəsilə, bu halda BƏƏ ilə, Aİ-nin öhdəliklərini də təmin edərək, regional sabitliyi və rifahı dəstəkləməyi müzakirə edə biləcəyik.” - deyə Mersiye qeyd edib.