BAKI, AzerVoice, Orxan Qədirzadə

Qəzza zolağının cənubunda tunel şəbəkəsinin zərərsizləşdirilməsi əməliyyatları zamanı yaxın günlərdə öldürülmüş daha doqquz fələstinli döyüşçünün cəsədi aşkarlanıb.

AzerVoice xəbər verir ki, Ordunun məlumatına görə indiyədək həmin ərazidə tunellərdən qaçmağa cəhd göstərən 30-dan çox Hamas üzvü öldürülüb.

İsrailin nəzarətində olan ərazilərin altındakı tunellərdə qalmış onlarca HƏMAS döyüşçüsünün taleyi ilə bağlı danışıqlar aparılır. Çərşənbə günü HƏMAS ilk dəfə rəsmi şəkildə vasitəçi ölkələrdən “təhlükəsiz keçid üçün İsrailə təzyiq göstərməyi” tələb edib.

ABŞ-ın vasitəçiliyi ilə İsrail və Hamas arasında imzalanmış atəşkəs 10 oktyabrda qüvvəyə minib. Şərtlərə əsasən, İsrail ordusu Qəzza daxilində sarı beton bloklarla işarələnmiş “Sarı Xəttin” arxasına çəkilib. Hazırda HƏMAS döyüşçüləri bu xəttin İsrail nəzarətində olan tərəfindəki tunellərdə mühasirədə qalıb.

Vasitəçi ölkələrdən birinin rəsmisi AFP-yə bildirib ki, ABŞ, Misir, Türkiyə və Qətər Hamas döyüşçülərinin Sarı Xəttin arxasındakı bölgədən təhlükəsiz çıxarılması üçün kompromis üzərində işləyir. Mənbənin sözlərinə görə, mövcud təklif onların İsrail nəzarətində olmayan ərazilərə keçməsinə imkan verə bilər, beləliklə atəşkəsin pozulması riski azalar.

Qəzzadakı yüksək rütbəli HƏMAS rəsmisi döyüşçülərin sayını 60–80 nəfər arasında qiymətləndirib. İsrail hökumətinin sözçüsü isə AFP-yə bildirib ki, Baş nazir Benyamin Netanyahu “təhlükəsiz keçidə icazə vermir.”

Tərəflər bir-birini şərtləri pozmaqda ittiham etdiyi bir vaxtda Qəzza zolağı dərin humanitar böhran yaşayır.

Xatırladaq ki, münaqişə HƏMAS-ın 7 oktyabr 2023-cü il hücumu ilə başlayıb. Hücumda 1 221 nəfər həlak olub.

İsrailin cavab əməliyyatları nəticəsində ən azı 69 799 nəfərin öldüyü bildirilir. Fələstin Səhiyyə Nazirliyi əlavə edir ki, atəşkəs qüvvəyə mindikdən sonra İsrail atəşi nəticəsində 352 fələstinli həlak olub.