BAKI, AzerVoice, Nailə Babazadə

İsrail rəhbərliyinin Qəzza Zolağında əldə edilən atəşkəs anlaşmasının ikinci mərhələsinin icrası üçün xüsusi qrup yaratmaq qərarı verdiyi bildirilib.

AzerVoice xəbər verir ki, Təhlükəsizlik Kabinetinin dünən axşam keçirilən iclasının nəticəsi olaraq Qəzzadakı atəşkəsin ikinci mərhələsinin həyata keçirilməsi üçün bir qrupun yaradılması qərara alınıb.

Məlumata əsasən, qurulacaq qrupda İsrailin ifrat sağçı Milli Təhlükəsizlik naziri İtamar Ben-Qvir və Maliyyə naziri Betsalel Smotriç də yer alacaq.

Qrupda yer alacaq Ben-Qvir və Smotriç Qəzzada iki illik soyqırım zamanı bölgənin tam işğal edilməsini, buradakı fələstinlilərin digər ölkələrə sürgün olunmasını və ərazilərin zəbt edilərək burada yəhudilər üçün qeyri-qanuni məskənlərin tikilməsini müdafiə edirdilər.

ABŞ Prezidenti Donald Tramp tərəfindən açıqlanan atəşkəs planı İsrail və HƏMAS tərəfindən qəbul edildikdən sonra 10 oktyabrda qüvvəyə minmişdi.

Atəşkəsin birinci mərhələsi qarşılıqlı əsir dəyişməsini əhatə edirdi. Bu çərçivədə HƏMAS özündə saxladığı 20 sağ israilli əsiri və 25 nəfərin cəsədini İsrail tərəfinə təhvil verib.

İsrail isə atəşkəsin ikinci mərhələsinə keçid üçün Qəzzada olan biri israilli, biri nepalı olmaqla 3 əsirin cəsədinin də təhvil verilməsini tələb edir.