BAKI, AzerVoice, Səməd Əyyubov
İranın xarici işlər naziri Seyid Abbas Əraqçi bildirib ki, ABŞ-la danışıqlar vasitəçilər üzərindən davam edir və Vaşinqton qarşılıqlı hörmət əsasında dialoqa hazır olduqda, Tehran da buna hazır olacaq.
AzerVoice xəbər verir ki, nazir bu fikirləri “İranın azad və ticarət zonalarında imkanlar və investisiya fürsətləri” adlı milli konfransda çıxışı zamanı səsləndirib.
Əraqçi qeyd edib ki, ölkə çoxşaxəli sanksiyalarla üz-üzədir və bu, xalqın həyatına ciddi təsir göstərir. Lakin onun sözlərinə görə, vəziyyəti “axır zaman” kimi qələmə vermək düzgün deyil:
“Bəli, təsirləri var, amma nə onları görməzdən gəlmək, nə də şişirtmək olar. Doğru yol reallığa əsaslanmaqdır.”
Nazir əlavə edib ki, bütün problemlər xarici amillərdən qaynaqlanmır, daxildə də çatışmazlıqlar mövcuddur. Onun sözlərinə görə, investorların xidmətlərə ehtiyacı var, bu sahədə ciddi boşluqlar qalmaqdadır, iqtisadi müharibə şəraiti də müəyyən məhdudiyyətlər yaradır. Əraqçi vurğulayıb ki, hökumətin əsas vəzifəsi həm xarici təzyiqlərə qarşı davamlılığı artırmaq, həm də investisiyalara əlverişli şərait yaratmaqdır.
O, İranın dünya ticarət yollarının qovşağında yerləşdiyini, az sayda ölkəyə məxsus üstünlüklərə malik olduğunu qeyd edib. Sanksiyalara baxmayaraq, ölkəyə səfərlər və danışıqlar davam edir, iqtisadi imkanlar isə geniş olaraq qalır. Xarici İşlər Nazirliyi diplomatiyanı iqtisadi inkişafın xidmətinə yönəltməyi qarşıya məqsəd qoyub. Bu çərçivədə hər bir azad zona üzrə xüsusi xarici siyasət əlavəsinin hazırlanacağı, həmin bölgələrin xaricdə hansı nümayəndəliklər tərəfindən dəstəklənəcəyi və beynəlxalq tədbirlərdə hansı formatda təmsil olunacağı müəyyən ediləcək.
Əraqçi bildirib ki, məqsəd azad zonalarla diplomatiya orqanları arasında üzvi əlaqə yaratmaqdır. Bu məqsədlə səfirliklərə iqtisadi fürsətləri müəyyənləşdirmək və maneələri aradan qaldırmaq tapşırılacaq.
Nazir əlavə edib ki, Xarici İşlər Nazirliyinin əsas missiyalarından biri də sanksiyaların aradan qaldırılmasıdır. Bu istiqamətdə yeni hökumət dövründə danışıqlar planlaşdırılıb və beş raund keçirilib. O, altıncı raunddan öncə baş vermiş hərbi hücuma və ardınca ABŞ-ın da prosesə qoşulmasına toxunaraq deyib: “Şəhidlərin qanı axarkən danışıqlara əvvəlki şərtlərlə dönə bilmərik.”
Əraqçi əlavə edib ki, bundan sonra danışıqlar yeni şərtlər nəzərə alınaraq aparılacaq.
Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək rütbəli hərbçi, o cümlədən İran Silahlı Qüvvələrinin Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər həlak olub. İran BMT Təhlükəsizlik Şurasının hadisə ilə əlaqədar fövqəladə iclas çağırılmasını istəyib.
Bu hücumlara cavab olaraq isə İran Ordusu İsrailə qarşı "Doğru vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.
ABŞ isə münaqişənin gərginləşməsindən doqquz gün sonra – 22 iyun gecəsi İrandakı üç nüvə obyektinə hücum etməklə münaqişəyə qoşulub. 23 iyun axşamı İran ABŞ-ın Qətərdə yerləşən və Yaxın Şərqin ən böyük Amerika bazası olan Əl-Udeyd bazasına raket zərbəsi endirib. ABŞ hakimiyyət orqanlarının verdiyi məlumata görə, hücum nəticəsində itki və ya ciddi dağıntı qeydə alınmayıb.
İyunun 24-də ABŞ prezidenti Donald Tramp İsrail və İranın tam atəşkəsin qüvvəyə mindiyini bəyan edib. İsrail tərəfi də ABŞ-ın atəşkəs təklifini qəbul etdiyini və qarşıya qoyulan bütün məqsədlərə nail olunduğunu bildirib.