BAKI, AzerVoice
Zəngəzur dəhlizinin reallaşdırılması üçün işlər davam edir.
AzerVoice xəbər verir ki, bunu Türkiyə Ədalət və İnkişaf Partiyasının (AKP) Sədr müavini Kürşad Zorlu deyib.
"Bu dəhliz yalnız Türkiyə və Azərbaycan üçün deyil, bütün region üçün rifah və sabitlik gətirəcək. Çin sərhədindən çıxan bir konteyner, türk dövlətləri üzərindən Avropaya çatacaq. Bu vizyon türk dünyasında ikinci dirçəlişi başladacaq. İnşallah bunu birlikdə izləyəcəyik və yaşayacağıq" - deyə, o bildirib.
Zorlu həmçinin, AKP-nin türk dövlətləri ilə əlaqələri gücləndirmək üçün böyük səy göstərdiyini bildirib. O, Azərbaycanın Qarabağ zəfərinin türk dünyasında yeni bir ruh yaratdığını vurğulayıb.
"Türkiyə və Azərbaycanın birlikdə başladığı və birlikdə qurduğu bu mübarizədə, başda qəhrəman Azərbaycan Ordusu olmaqla, Türkiyə də bütün mənəvi gücü və hərbi dəstəyi ilə Azərbaycanın yanında olduğunu göstərdi. Bu inam və bu qətiyyətlə zəfər əldə edildi və Türk dünyasında yeni bir ruh yarandı" - deyə, o bildirib.
Zorlu, Türk Dövlətləri Təşkilatının gələcəkdə bölgədə sülh və sabitliyin açar aktorlarından biri olacağını bildirib.
Son olaraq, Zorlu qeyd edib ki, Türkiyə qarşısındakı bütün maneələri aşaraq "Türkiyə əsri"nə doğru irəliləyəcək.
