BAKI, AzerVoice

Türkiyə Prezident Administrasiyasının Kommunikasiya İdarəsinin rəhbəri Fahrettin Altun Azərbaycan mətbuatının 150 illiyi münasibətilə xüsusi videomesaj yayımlayaraq Azərbaycan xalqını və media nümayəndələrini təbrik edib.

AzerVoice xəbər verir ki, Altun Azərbaycan mətbuatının cəmiyyətə düzgün, obyektiv və vaxtında məlumat çatdırmaq baxımından mühüm rol oynadığını vurğulayaraq, jurnalistləri "həqiqətin uca səsi" adlandırıb.

O, bildirib ki, Azərbaycan mətbuatı yalnız xəbər verməklə kifayətlənməyib, eyni zamanda xalqın səsi, mədəni irsin qoruyucusu və fikir azadlığının müdafiəçisi olub.

Fahrettin Altun qeyd edib ki, dezinformasiyanın artdığı dövrdə Azərbaycan mediası həqiqətin yayılmasına önəmli töhfə verib. Xüsusilə, II Qarabağ müharibəsi zamanı Azərbaycanın haqq səsini dünyaya çatdırmaqda medianın mühüm rol oynadığını vurğulayan Altun, Həsən bəy Zərdabinin 1875-ci ildə nəşr etdiyi “Əkinçi” qəzeti ilə başlayan Azərbaycan mətbuatının bu gün də uğurla davam etdiyini bildirib.

Altun, Türkiyə və Azərbaycan liderlərinin iştirakı ilə imzalanan “Azərbaycan–Türkiyə arasında Media Sahəsində Strateji Əməkdaşlığa dair Anlaşma Memorandumu”nun iki ölkə arasında media əməkdaşlığını daha da möhkəmləndirdiyini qeyd edib.

O bildirib ki, Türkiyə və Azərbaycan ortaq tarix, mədəniyyət və dəyərlər əsasında qurulan sıx əlaqələrə malikdir. Münasibətlər “Bir millət, iki dövlət” şüarı ilə hər sahədə inkişaf edir.

“Prezidentlərimizin güclü iradəsi ilə media sahəsində əməkdaşlığımızı daha da inkişaf etdirəcəyik” – deyə Altun əlavə edib.

O, çıxışını Azərbaycan mətbuatının 150 illik yubileyi münasibətilə jurnalistləri bir daha təbrik edərək, onlara uğurlar və rifah arzulamaqla yekunlaşdırıb.