BAKI, AzerVoice

Rusiya və Ukrayna arasında artıq müəyyən diplomatik uğurlar əldə olunub.

AzerVoice xəbər verir ki, bunu Türkiyənin xarici işlər naziri Hakan Fidan Ukraynaya səfəri zamanı jurnalistlərin suallarını cavablandırarkən deyib.

“Ən böyük uğurlardan biri min hərbi əsirin dəyişdirilməsi oldu. Bundan sonra isə tərəflər ilk dəfə rəsmi şəkildə atəşkəs mövqelərini yazılı şəkildə qarşı tərəfə təqdim etdilər və bunun üzərindən danışıqlar davam etdirildi” - deyə, o bildirib.

Nazir bildirib ki, müzakirə prosesinin başlaması münaqişənin daha ümidverici bir istiqamətə yönəlməsinə səbəb olub.

“İki tərəf də atəşkəs istəyir. Heç kim ‘atəşkəs istəmirəm’ deməz. Çünki bu, həm beynəlxalq ictimaiyyət qarşısında, həm də daxili cəbhədə izah olunması çətin bir mövqedir”, - o vurğulayıb.

Lakin Hakan Fidan qeyd edib ki, tərəflərin atəşkəslə bağlı tələbləri fərqlidir və bu tələblərin uzlaşdırılması üçün vasitəçilik və diplomatik təmaslar zəruridir.

Nazir həmçinin bildirib ki, Türkiyə həm Rusiya, həm də Ukrayna ilə sıx diplomatik əlaqələrə malikdir və danışıqlara ev sahibliyi etmək üçün uyğun ölkədir.

“Biz Putinə, Medinskiyə və Lavrova sülh səylərimizi və bu məsələyə baxışımızı çatdırdıq. Bizim region ölkəsi olaraq baxışımız yalnız hərbi qarşıdurmanın qarşısını almaq deyil, eyni zamanda sülh üçün real parametrləri formalaşdırmaqdır” - deyə, Fidan qeyd edib.

Fidan ABŞ-ın da bu prosesdə mühüm rol oynamalı olduğunu vurğulayıb.

“Prezident [Donald] Tramp açıq şəkildə atəşkəs istəyini ifadə edib. Ukrayna və Avropa bu çağırışa uyğunlaşdı, lakin Rusiya hələ ki, tam uyğunlaşma göstərmir. Bu da Rusiyanı diplomatik cəhətdən zəif vəziyyətə sala bilər” - deyə, nazir bildirib.

Nazir qeyd edib ki, Türkiyənin bu məsələdə məqsədi sırf regional sülh və sabitlikdir.

“Bizim regionda stabillik olmadan iqtisadi sabitlik və təhlükəsizlik də təmin edilə bilməz. Ona görə də biz diplomatiyanı bacardığımız qədər istifadə edirik. Türkiyə Suriya, İraq, Balkanlar, Qafqaz və Şərqi Aralıq dənizində sülh gətirən gücdür” - deyə, o bildirib.

“Bütün tərəflərin qəbul edə biləcəyi bir aktor olmaq vasitəçilikdə əsas meyardır. Rusiyanın Türkiyənin rolunu qəbul etməsi çox önəmlidir. Biz bu məsələdə üzərimizə düşəni edirik və edəcəyik” - deyə, o əlavə edib.

Hakan Fidan, diplomatik səylərin nə qədər önəmli olsa da, müharibənin yaratdığı insan itkisi və maliyyə yükünün böyüklüyünə işarə edib.

“Nə qədər səylə çalışsaq da, bu müharibənin bir günündə yaşanan itkini kompensasiya etmək mümkün deyil. Bu səbəbdən bütün məsul ölkələrin hərəkətə keçməsi vacibdir” - deyə, Fidan vurğulayıb.

Rusiya tərəfinin müharibənin uzanmasında maraqlı olması barədə müzakirələrə münasibət bildirən Fidan deyib: “Rusiyanın bəzi strateji hədəfləri var. Bunların beynəlxalq hüquqa nə dərəcədə uyğun olub-olmaması isə ayrıca müzakirə mövzusudur. Amma hər iki tərəfin tutumları dəyişə bilər. Trampın seçilməsindən sonra Ukrayna və Avropa tez uyğunlaşdı, Putin isə hələ bunu etməyib.”

Nazir son olaraq qeyd edib ki, Türkiyə müzakirə prosesində bütün əsas aktorlarla təmasdadır.

“Rusiya ilə, Ukrayna ilə, Avropa ilə danışırıq. Tərəflər bizdən həm mövqe öyrənmək, həm də öz fikirlərini bölüşmək istəyirlər. Bu, koordinasiya və dialoq üçün çox vacibdir” - deyə, Nazir yekunlaşdırıb.