BAKI, AzerVoice
ABŞ-ın Yaxın Şərq siyasətini və PKK/YPG-yə münasibətdə göstərdiyi ikili yanaşmasına qarşı bu ilin yayında genişmiqyaslı diplomatik kampaniya başladacağıq.
AzerVoice xəbər verir ki, bunu Türkiyə Xarici İşlər Naziri Hakan Fidan, Ədalət və İnkişaf Partiyası (AKP) millət vəkilləri ilə keçirdiyi qapalı toplantıda çıxış edərkən deyib.
“ABŞ administrasiyası, İsrailin təhlükəsizliyini əsas götürən bir Yaxın Şərq prinsipi ilə hərəkət edir. Bu isə bizim bölgədəki ərəb ölkələri ilə təmaslarımızı daha da əhəmiyyətli edir. Cari ilin ikinci yarısında Körfəz ölkələri ilə müdafiə sənayesi sahəsində əməkdaşlığımızı genişləndirəcəyik. Eyni zamanda, PKK/YPG mövzusundakı ikili münasibətə qarşı diplomatik kampaniyaya başlayırıq” - deyə, Hakan Fidan vurğulayıb.
Türkiyə XİN həmçinin, ABŞ və İsrailin fələstinlilərə qarşı apardığı məcburi köç siyasətini də sərt şəkildə tənqid edib.
“Misir və İordaniyaya yönələn "könüllü çıxış proqramı"nı heç kim istəmir. Hər iki ölkə ilk gündən ‘bu insanları qəbul etmərik’ dedilər. İsrail və ABŞ indi Afrika və Asiya-Sakit Okean bölgəsinə üz tutublar. Onlardan ‘Fələstinliləri qəbul edərsinizmi?’ deyə soruşurlar. Hətta İndoneziya prezidenti bizə bildirdi ki, amerikalılar onlara belə təkliflə gəlib, üstəlik pul da verə biləcəklərini deyiblər. Biz də bu cür təklifləri diplomatik kanallarda müzakirə edirik. Hələlik ciddi dəstək yoxdur, lakin bəzi fələstinlilərin xarici pasportlar daşıması və ya dözə bilməyib çıxmaq istəməsi səbəbindən az sayda olsa da, köçlər baş verir” - deyə, Fidan qeyd edib.
Bununla yanaşı Hakan Fidan, ABŞ ilə Çin arasında yaşanan ticarət gərginliyinə də diqqət çəkib.
“Bu mübarizə artıq sadəcə gömrük rüsumları ilə məhdudlaşmır. Texnoloji üstünlük, istehsal zəncirləri və qlobal logistik mərkəzlər uğrunda rəqabətə çevrilib. Biz bu prosesi diqqətlə izləyirik və Ticarət və Xəzinə Nazirlikləri ilə koordinasiyalı şəkildə geniş analizlər aparırıq. Bu vəziyyət Türkiyə üçün fürsətə çevrilə bilər. Avropaya yaxınlığımız, istehsal gücümüz və logistik üstünlüklərimiz səbəbilə bir çox Qərb şirkəti tədarük zəncirlərini Türkiyəyə köçürməyi qiymətləndirir. Bu potensialı konkret sərmayələrə çevirmək üçün özəl sektor və ticarət müşavirlərimizlə birlikdə işləyirik” - deyə, o bildirib.
