BAKI,AzerVoice
İsrailin bu gün səhər saatlarında Qəzza zolağının müxtəlif bölgələrinə endirdiyi hava zərbələri nəticəsində 44 fələstinli, o cümlədən çoxlu sayda qadın və uşaq həlak olub.
AzerVoice xəbər verir ki, Fələstin Mülki Müdafiə Xidmətinin sözçüsü Mahmud Bəsəl Frans Press agentliyinə verdiyi açıqlamada bildirib ki, "okupasiya qüvvələrinin bu gün səhər saatlarında həyata keçirdiyi yeni qətliamlarda azı 44 şəhidin cəsədi çıxarılıb, onların böyük əksəriyyəti qadın və uşaqlardır". Hadisə nəticəsində onlarca yaralının olduğu da qeyd edilib.
Ən ağır hücumlardan biri Nusayrat düşərgəsinin qərbində yerləşən “Radi” yanacaqdoldurma məntəqəsinə endirilib. Bu hücumda Nəsar ailəsindən 15 nəfər həyatını itirib, çoxu uşaq olan yaralılar xəstəxanaya çatdırılıb.
Eyni zamanda, Deyr əl-Bəla şəhərində Əbu Səmrə ailəsinə məxsus evə endirilən zərbə nəticəsində 12 nəfər həlak olub. Şimalda yerləşən Qəzza şəhərinin Dirəc məhəlləsində minlərlə məcburi köçkünün sığındığı "Musa bin Nusayr" məktəbinə hücum nəticəsində azı 8 nəfər öldürülüb, çox sayda insan yaralanıb. Məlumatda məktəbin sinif otaqlarının birbaşa vurulduğu qeyd olunub.
Cəbalya düşərgəsində isə əl-Muqəyyid ailəsinin evinə endirilən zərbə nəticəsində 9 nəfər, o cümlədən uşaqlar həlak olub.
Mahmud Bəsəl bildirib ki, "şimal bölgəsində, Xan Yunis və Rəfahda davam edən intensiv bombardmanlar səbəbilə dağıntılar altındakı bir çox insanlara müdaxilə etmək mümkün deyil".
Qəzzada 7 oktyabr 2023-cü ildən bu yana davam edən müharibə nəticəsində fələstinli qurbanların sayı 53 486 nəfərə çatıb. Bunlardan azı 3340 nəfəri, İsrailin 18 martda iki aylıq qısa atəşkəsdən sonra hücumlarını bərpa etməsindən bu yana öldürülüb.
Xatırladaq ki, ötən gün Britaniya, Fransa və Kanada liderləri İsrailə qarşı ciddi tədbirlərin görülə biləcəyi ilə hədələyərək Qəzzadakı hərbi əməliyyatların dayandırılmasını və humanitar yardım üzərindəki məhdudiyyətlərin qaldırılmasını tələb etmişdi.
İsrail ordusu isə keçən cümə yeni əməliyyatlara başladığını açıqlamış, beynəlxalq müşahidəçilər isə bölgədə yaxınlaşmaqda olan genişmiqyaslı aclıq təhlükəsinə dair xəbərdarlıq etmişdi.