BAKI, AzerVoice AutoHub

Almaniya avtomobil nəhəngi Porsche, hazırda Avropada qapalı qapılar arxasında gizli bir iclas keçirir. İclasın əsas müzakirə mövzusu şirkətin əfsanəvi 718 Boxster və Cayman modellərinin elektrikli versiyalarının taleyidir.

AzerVoice xəbər verir ki, "The Drive" nəşrinin əldə etdiyi eksklüziv məlumata görə, rəhbərlik bu modellərin istehsalına davam edilib-edilməyəcəyi barədə yekun qərar vermək üzrədir. Bu kritik toplantı, elektrikli idman avtomobilləri layihəsinin "istehsalat böhranına" (development hell) girdiyi barədə yayılan xəbərlərdən cəmi bir həftə sonraya təsadüf edir.

Layihə niyə təhlükədədir?

Layihənin dayandırılma ehtimalının arxasında duran əsas səbəblər kimi istehsalın gecikməsi və artan xərclər göstərilir. Şirkətin yeni Baş İcraçı Direktoru (CEO) Maykl Leyters yanvarın 1-də vəzifəyə gəldikdən sonra bütün layihələri yenidən nəzərdən keçirməyə başlayıb və bu problemləri ciddi əngəl kimi görür.

Mühəndislərin "Çəki" Kabusu

Porsche mühəndisləri qarşısında çox çətin bir tapşırıq var və bu elektrikli idman avtomobilinin çəkisini 1800 kq-dan (4000 funt) aşağı saxlamaqdır.

Ağır batareya paketləri ilə təchiz olunmuş bir avtomobilin həm yüngül, həm də ictimai yollarda sürülə bilən bir idman avtomobili olması ciddi texniki çətinliklər yaradır.

İlkin plana əsasən, yeni nəsil Boxster və Cayman tamamilə elektrikli olmalı idi. Lakin yaranmış problemlər səbəbindən Porsche rəhbərliyi artıq istehsalı dayandırılmış benzin mühərrikli modelləri "lüks kateqoriya" kimi yenidən bazara qaytarmağı nəzərdən keçirir.

Yeni Texnologiya: "Süni Sürət Keçidi"

Bütün bu problemlərə baxmayaraq, Porsche innovasiyadan əl çəkməyib. Şirkət, Hyundai Ioniq 5 N modelindən ilhamlanaraq, elektrikli avtomobillərdə daxili yanma mühərrikinin hissini yaratmaq üçün süni sürət qutusu keçidləri (fake gear shifts) texnologiyasını hazırlayıb. Bu sistemin həm 718 modellərində, həm də gələcək Taycan versiyalarında tətbiqi gözlənilirdi.

İclasın nəticəsindən asılı olaraq, ya dünya yeni elektrikli Porsche əfsanələrini görəcək, ya da layihə arxivə göndəriləcək.