BAKI,AzerVoice, Fərid Mikayılov
Çin Xalq Respublikasına işgüzar səfəri çərçivəsində Şanxay Əməkdaşlıq Təşkilatının (ŞƏT) sammitində iştirak edən Türkmənistan Prezidenti Sərdar Berdiməhəmmədov ölkəsinin təşkilata üzv dövlətlərə təbii qaz tədarükünü artırmağa hazır olduğunu bəyan edib.
AzerVoice xəbər verir ki, Berdiməhəmmədov çıxışında qeyd edib ki, Türkmənistan enerji sektorunda əməkdaşlığı strateji istiqamət kimi görür.
“Biz ŞƏT ölkələrinə təbii qaz ixracını artırmağa hazırıq. Hazırda elektroenergetika sahəsinə də xüsusi diqqət yetiririk. Elektrik enerjisinin ixracı, onun istiqamətləri və həcmlərinin genişləndirilməsi ilə bağlı məsələləri müzakirə etməyə açığıq. Ümumilikdə, enerji əməkdaşlığı ŞƏT ilə tərəfdaşlığın prioritet istiqamətlərindən biridir”– deyə Berdiməhəmmədov bildirib.
Qeyd edək ki, 2024–2025-ci illərdə ŞƏT-də sədrlik funksiyasını Çin Xalq Respublikası icra edir. Budəfəki toplantıya 20-dən çox ölkənin dövlət və hökumət başçıları qatılıb.
