BAKI,AzerVoice

Türkmənistan uzunmüddətli əsasda İran İslam Respublikasına təbii qaz ixrac etməyi və İran üzərindən digər ölkələrə “swap” mexanizmi ilə qaz ötürülməsini həyata keçirməyi planlaşdırır.

AzerVoice xəbər verir ki, bu barədə Tehran şəhərində keçirilən iqtisadi əməkdaşlıq üzrə Türkmənistan–İran hökumətlərarası komissiyasının 18-ci iclasında açıqlama verilib.

Görüşdə Türkmənistan tərəfinə Nazirlər Kabinetinin sədr müavini və xarici işlər naziri Rəşid Meredov, İran tərəfinə isə yol və şəhərsalma naziri Fərzanə Sadiqi Məlvacərd rəhbərlik edib.

Meredov çıxışında Türkmənistanın İranla təbii qaz sahəsində əməkdaşlığı genişləndirməyə sadiq olduğunu bildirib.

“İrana təbii qazın uzunmüddətli ixracını planlaşdırırıq. Eyni zamanda İran üzərindən üçüncü ölkələrə qaz tranzitinin həyata keçirilməsi də əsas hədəflərimizdəndir” – deyə Meredov vurğulayıb.

Türkmən naziri əlavə edib ki, bu sahədə zəruri texniki və iqtisadi imkanlar mövcuddur. O, həmçinin qeyd edib ki, son 15 ildə neft-kimya sahəsində uğurlu əməkdaşlıq qurulub və təcrübə mübadiləsi bu istiqamətdə faydalı ola bilər.

Görüş zamanı Türkmənistanın Yaponiya və Cənubi Koreya şirkətləri ilə əməkdaşlıq etdiyi, İran şirkətləri ilə də analoji əməkdaşlıq üçün geniş imkanların olduğu bildirilib.