BAKI, AzerVoice

Türkiyənin Kahramanmaraş vilayətində intensiv qar yağışı səbəbindən bütün məktəblərdə tədrisə bir günlük fasilə verilib.

AzerVoice xəbər verir ki, Kahramanmaraş Valiliyindən verilən məlumata görə, ötən gündən başlayan və bu gün də davam edən qar yağışı, eləcə də qarşıdakı günlərdə gözlənilən güclü buzlanma və şaxta riski nəzərə alınaraq, 2 yanvar 2026-cı il, cümə günü vilayət üzrə rəsmi və özəl bütün təhsil müəssisələrində dərslər dayandırılıb.

Valiliyin açıqlamasında bildirilir ki, Meteorologiya Xidmətinin məlumatlarına əsasən, qar yağışı axşam saatlarınadək fasilələrlə davam edəcək, cümə və şənbə günləri isə güclü buzlanma və don hadisələri gözlənilir. Şagirdlərin və vətəndaşların təhlükəsizliyi əsas götürülərək bu qərar qəbul edilib.

Qərara əsasən, dövlət qurumlarında çalışan hamilə qadınlar, əlilliyi olan şəxslər, uşaqları uşaq bağçasına və ya körpələr evinə gedən analar, həmçinin xroniki xəstəliyi olan əməkdaşlar inzibati məzuniyyətə buraxılacaq. Vətəndaşlara buzlanma və şaxta ilə bağlı ehtiyatlı olmaları tövsiyə edilib.

Elazığda da dərslər dayandırılıb
Elazığ vilayətində də davam edən qar yağışı səbəbindən tədrisə bir gün daha fasilə verilib.

Elazığ valisi Numan Hatipoğlu sosial şəbəkə hesabında paylaşdığı açıqlamada bildirib ki, 2 yanvar 2026-cı il tarixində də məktəblərdə dərs olmayacaq. O, şagirdlərə müraciət edərək bazar ertəsi dərslərə hazır və enerjili qayıtmalarını arzulayıb, bu müddətdə kitab oxumağı və dərslərlə məşğul olmağı tövsiyə edib.