BAKI,AzerVoice

İtaliyanın nüfuzlu qəzetlərindən Il Gazzettino, Türkiyənin qlobal siyasətdəki həlledici rolunu ön plana çıxaran geniş təhlil dərc edib. Qəzetin baş redaktoru Roberto Papettinin imzası ilə yayımlanan yazıda vurğulanır ki, nə NATO, nə də Avropa Türkiyədən vaz keçə bilməz, çünki Ankara olmadan nə regional, nə də qlobal təhlükəsizlik təmin oluna bilər.

Məqalədə Türkiyənin Pekində keçirilən BRİKS Zirvəsinə qatılması Qərb mediasında müzakirə mövzusu kimi göstərilir. Papetti qeyd edir ki, bu addım NATO daxilində müəyyən narahatlıq doğursa da, Türkiyənin Asiya ilə iqtisadi əlaqələrini gücləndirməsi və yeni əməkdaşlıqlara açıq olması Ankaranı qlobal sistemin mərkəzində əvəzolunmaz aktora çevirir.

Papetti, Prezident Rəcəb Tayyib Ərdoğanın pragmatik və çoxvektorlu xarici siyasəti sayəsində Türkiyənin regional gücdən qlobal arenada təsirli oyunçuya çevrildiyini yazıb.

“Ankara, Asiya ilə Avropa arasında strateji mövqeyi ilə artıq bir çox masada açar söz sahibidir.”-deyə məqalədə qeyd olunur.

Məqalədə o da qeyd edilib ki, Avropa İttifaqı, demokratiya kriteriyalarını bəhanə edərək Türkiyənin üzvlük prosesini ləngidib. Bu isə Ankaranı yeni tərəfdaşlıqlara yönəldib. BRICS

Zirvəsinə qatılım da bu siyasətin təbii nəticəsi kimi qiymətləndirilir.

Papetti, Türkiyənin NATO üzvlüyünün Qərblə hərbi bağların ən güclü göstəricisi olduğunu qeyd etsə də, ABŞ və Avropanın Ankara qarşısında mütləq ehtiyatlı davranmalı olduqlarını vurğulayır.

“Türkiyə bəzən proqnozlaşdırılması çətin və narahatlıq yaradan bir müttəfiqdir. Amma onu itirmək Qərb üçün strateji partnyor itkisi deməkdir və bu, Ankaranı Rusiya ilə Çin orbitinə itələyər.”-deyə o yazıb.

Məqalədə Türkiyənin yalnız hərbi deyil, enerji təhlükəsizliyi, ticarət marşrutları və miqrasiya idarəçiliyi sahələrində də Qərb üçün vazkeçilməz olduğu qeyd olunur.

“Ankara; Qaradəniz, Aralıq dənizi, Qafqaz, Yaxın Şərq və Balkanlarda unikal təsirə sahibdir. Bu, Qərbin böhran anlarında üz döndərə bilməyəcəyi bir ölkə deməkdir.”- Papetti yazıb.

Məqalədə həmçinin çinli avtomobil nəhəngi BYD-nin Türkiyəyə etdiyi sərmayə nümunə göstərilərək, ölkənin iqtisadi baxımdan da qlobal cazibə mərkəzinə çevrildiyi vurğulanır.

Türkiyə həm Qərb, həm də Şərq üçün sənaye, enerji və logistika sahələrində əvəzolunmaz mövqe tutur.

“Qərbin Türkiyə ilə münasibəti zəruri bir balans üzərində qurulub. Bu balansı pozmaq Qərbin xeyrinə deyil. Çünki Türkiyəsiz nə regional, nə də qlobal təhlükəsizlik təmin oluna bilər.

Avropa və ABŞ, Ankaradan narazı qalsa belə, qapını üzünə qapata bilməz; çünki Türkiyəsiz dünya düzəni artıq mümkün deyil.”-deyə Papetti, yazısını bu sözlərlə tamamlayıb