BAKI, Azervoice, Nərmin Ağayeva

Keçmiş Yunanıstan XİN rəhbəri - Türkiyə gücünü göstərir, Afina kənardan izləyir.

Azervoice xəbər verir ki, Yunanıstanın keçmiş xarici işlər naziri Dimitris Avramopulos Türkiyə-İtaliya-Liviya sammitinin nəticələrinə toxunaraq, Afina hökumətinin passiv mövqeyini tənqid edib.

Avramopulos bildirib ki, İstanbulda keçirilən üçtərəfli sammit Türkiyənin hərbi və geosiyasi gücündən səmərəli şəkildə istifadə etdiyini nümayiş etdirib. Onun sözlərinə görə, Yunanıstan yalnız seyrçi rolunda qalmaqla özünün beynəlxalq statusuna və cəmiyyətin psixologiyasına zərbə vurur. “Türkiyəni sadəcə təhdid kimi qəbul etməyimiz regiondakı proseslərdən kənarda qalmağımıza səbəb olur.” - deyə o bildirib.

Keçmiş nazir qeyd edib ki, Türkiyə Avropa və ərəb dünyası ilə əlaqələrini gücləndirdiyi halda, Yunanıstan bir daha masa arxasında deyil. O, xüsusilə Türkiyənin pilotsuz uçuş aparatları istehsalı və silah ixracatı sahəsində nüfuzunu artırdığına diqqət çəkib.

Avramopulos Afinanı yeni regional strategiya hazırlamağa çağıraraq, “Əks halda qonşular və tərəfdaşlar regionun xəritəsini yenidən çəkərkən biz sadəcə kənarda dayanacağıq.” - deyə bildirib.

Qeyd edək ki, İstanbulda baş tutan Türkiyə-İtaliya-Liviya sammitində regional təhlükəsizlik, enerji və əməkdaşlıq məsələləri müzakirə olunub. Bu təşəbbüs Yunanıstanda daxildə də ciddi siyasi reaksiyalar doğurub.