BAKI, AzerVoice
Türkiyənin Rusiya-Ukrayna danışıqlarına ev sahibliyi etməsi ilə bağlı hər hansı bir əngəl yoxdur.
AzerVoice xəbər verir ki, bu barədə Türkiyənin xarici işlər naziri Hakan Fidan, 17-ci BRİKS Liderlər Zirvəsi çərçivəsində Rio-de-Janeyroda verdiyi açıqlamalarda Ankaranın qlobal diplomatik nüfuzunun artdığını vurğulayıb.
Fidan bildirib ki, Türkiyənin beynəlxalq mövqeyi və diplomatik təcrübəsi ona müxtəlif platformalarda söz sahibi olmaq imkanı verir.
O, Rusiya və Ukrayna arasında sülhə ən yaxın nöqtənin İstanbulda keçirilən danışıqlar zamanı olduğunu xatırladıb. Onun sözlərinə görə, üçüncü mərhələ görüşlərinə Rusiya hazırdır, indi isə Ukraynanın cavabı gözlənilir.
“Cənab Putin də daxil olmaqla tərəflər bu görüşə qarşı çıxmır. Tramp, Putin və Zelenskinin cənab Prezidentimizin ev sahibliyində bir araya gəlməsi istiqamətində hər hansı bir maneə görünmür”- deyə o bildirib.
Nazir həmçinin İran və İsrail arasında atəşkəsin hələ də qüvvədə olduğunu bildirib. Lakin nüvə danışıqlarının yenidən başlayacağı ilə bağlı qeyri-müəyyənlik davam edir.