BAKI, AzerVoice

İnflyasiyaya qarşı mövqeyimizi davam etdirəcəyik.

AzerVoice xəbər verir ki, Türkiyə Prezidenti Rəcəb Tayyib Ərdoğan Haliç Konqres Mərkəzində keçirilən TİM-in 32-ci Baş Assambleyasında çıxış edərək inflyasiya ilə mübarizənin davam edəcəyini və 2025-ci ilin sonuna qədər inflyasiyanın 20 faizlərə enəcəyini gözlədiklərini bildirib.

Ərdoğan qeyd edib ki, inflyasiya son 3,5 ilin ən aşağı səviyyəsinə düşüb və iqtisadi proqramlar öz nəticəsini verir. “İnflyasiya ilə mübarizədə barışmaz mövqeyimizi qoruyuruq”, – deyə o bildirib.

Prezident ixracatçıları təbrik edərək, Türkiyənin iqtisadi yüksəlişində onların əvəzsiz rolunu vurğulayıb. 2025-ci ilin birinci rübündə ölkənin 2 faizlik böyümə göstərdiyini xatırladan Ərdoğan, ardıcıl 19 rüb ərzində fasiləsiz böyüməyə nail olduqlarını deyib.

Ərdoğan çıxışında həmçinin 2028-ci ilə qədər uzaq ölkələrə 50 milyard dollarlıq ixrac hədəflədiklərini, Türkiyənin dünyada satılan hər 3 İHA-dan 2-sini istehsal etdiyini və müdafiə sənayesində qlobal uğurların davam edəcəyini bildirib.

"Türkiyə Yüzyılı" idealını birlikdə reallaşdıracağıq. Biz qısa məsafə yox, marafon qaçışçılarıyıq", – deyə Ərdoğan çıxışını tamamlayıb.