BAKI, AzerVoice

İnflyasiya mərhələli şəkildə enməkdə davam edəcək.

AzerVoice xəbər verir ki, Türkiyənin Xəzinə və Maliyyə Naziri Mehmet Şimşək "Maliyyə Savadlılığı Günü" proqramında çıxış edərək inflyasiyanın enişi, makroiqtisadi sabitlik və enerji sektorunda yaşıl transformasiya ilə bağlı önəmli açıqlamalar verib.

Nazir çıxışında qeyd edib ki, 2023-cü ilin ilk rübündə sosial mediada əsassız çağırışlarla vətəndaşlar xarici valyutaya yönləndirilsə də, hökumət iqtisadi siyasətdə ardıcıl yanaşma nümayiş etdirib və vətəndaşların portfel seçimlərinə hörmətlə yanaşıldığını vurğulayıb.

“Keçən ilin ikinci yarısından etibarən inflyasiya sürətlə azalmağa başladı. 2023-cü ili təxminən 44 faizlik inflyasiya səviyyəsi ilə başa vurduq. Eyni zamanda cari əməliyyatlar balansının kəsiri milli gəlirə nisbətdə 1 faizdən aşağı düşdü. Əgər qızıl idxalını nəzərə almasaq, 2024-cü ildə Türkiyə cari əməliyyatlar profisiti (artıqlığı) verdi,” – deyə Şimşək bildirib.

Nazir əlavə edib ki, həyata keçirilən iqtisadi proqram çərçivəsində inflyasiyanın 2025-ci ildə də azalmağa davam edəcəyi gözlənilir. “İnflyasiyanın azaldılması bizim əsas prioritetimizdir. Bu il də cari hesab kəsirinin nisbətən aşağı səviyyədə qalacağını düşünürük.” - deyə o bildirib.

“Aprel ayı etibarilə ölkəmizin elektrik enerjisi istehsalının 53 faizi bərpa olunan mənbələrdən təmin olunub. 2024-cü ilin ümumi göstəricisi isə 48 faiz təşkil edir. Bu tendensiya gələcəkdə neft və təbii qaz idxalının azalmasına müsbət təsir göstərəcək.” - deyə Şimşək həmçinin Türkiyənin enerji siyasətində yaşıl keçid istiqamətində əldə etdiyi uğurlardan danışaraq vurğulayıb.

Qeyd edək ki, Türkiyənin həyata keçirdiyi dezinflyasiya və makroiqtisadi sabitlik proqramları çərçivəsində qiymət artımlarına qarşı struktur islahatlar davam etdirilir. Şimşək bu siyasətin davamlı olacağını və bazar güvənini qorumağın əsas hədəf olduğunu vurğulayıb.