BAKI, AzerVoice

Türkiyə prezidenti Rəcəb Tayyib​ Ərdoğan Şimali Kiprdə Prezident kampusu və TEKNOFEST açılışında iştirak edəcək.

AzerVoice xəbər verir ki,Ərdoğan özəl “TC-TRK” təyyarəsi ilə Şimali Kipr Türk Cümhuriyyətinə (KKTC) səfər edib.

Onu Atatürk Hava Limanında vitse-prezident Cevdet Yılmaz, İstanbul valisi Davud Gül və AK Partiya İstanbul İl sədri Abdullah Özdemir yola salıb.

Ərdoğana bu səfərdə xarici işlər naziri Hakan Fidan, səhiyyə naziri Kamal Memişoğlu, gənclər və idman naziri Osman Aşkın Bak, ticarət naziri Ömər Bolat, AK Partiya sözçüsü Ömər Çelik, Prezident Aparatının kommunikasiyalar üzrə direktoru Fahrettin Altun və digər rəsmilər müşayiət edir.

Prezident Ərdoğanın səfər çərçivəsində KKTC Prezidentlik Kompleksinin, Respublika Məclisinin, Baş Nazirliyin və Millət Bağçasının yerləşdiyi kampusun açılışını etməsi və TEKNOFEST KKTC mükafat mərasimində iştirak etməsi planlaşdırılır. Ərdoğanın KKTC prezidenti Ersin Tatarla da görüşü gözlənilir. Görüş zamanı ikitərəfli münasibətlər və Kipr problemi də daxil olmaqla beynəlxalq məsələlər müzakirə olunacaq.

Qeyd edək ki, 2022-ci ildə təməli qoyulan KKTC Prezidentlik Kompleksinin inşası artıq tamamlanıb. 639 min kvadratmetrdən çox ərazini əhatə edən kampusda iclas zalları, konfrans salonu, kitabxana, yeməkxana və geniş ictimai məkanlar yer alır. Kompleks daxilində Milli Bağda məscid, futbol meydançası, tennis kortu və skeytbord treki də mövcuddur. Yeni kampusun açılışından sonra Prezidentlik və Respublika Məclisinin buraya köçürülməsi, mövcud tarixi binanın isə muzeyə çevrilməsi nəzərdə tutulur.