BAKI, AzerVoice

Türk Dövlətləri Təşkilatına (TDT) üzv ölkələrin seçki orqanları arasında əməkdaşlığı möhkəmləndirmək, seçki proseslərinin şəffaflığını artırmaq və ortaq demokratik dəyərlər ətrafında institutlaşdırılmış dialoq yaratmaq məqsədilə mühüm bir addım atılıb.

AzerVoice xəbər verir ki, bu məqsədlə “Mərkəzi Seçim Otoritələri Məsləhətləşmə Platforması” rəsmi olaraq təsis edilib.

Platformanın yaradılmasına dair rəsmi tədbir Qazaxıstanın Türkistan şəhərində təşkil olunub. Tədbirdə Türk Dövlətləri Təşkilatının üzv ölkələrinin mərkəzi seçki orqanlarının rəhbərləri, beynəlxalq müşahidəçilər, hüquqşünaslar və ekspertlər iştirak ediblər.

Platforma TDT məkanında demokratik təsisatların inkişafına xidmət etməklə yanaşı, seçki sahəsində səmərəli əməkdaşlıq, təcrübə mübadiləsi və qarşılıqlı dəstək mexanizmlərinin formalaşdırılmasını hədəfləyir.

Platformanın əsas hədəfləri sırasında üzv ölkələr arasında seçki ilə bağlı texniki biliklərin paylaşılması, seçki proseslərinin monitorinqi və qiymətləndirilməsi sahəsində birgə standartların tətbiqi, eləcə də qarşılıqlı məsləhətləşmələrin rəsmi və davamlı mexanizmə çevrilməsi xüsusi vurğulanıb.

Tədbirin sonunda iştirakçı ölkələrin nümayəndələri platformanın uzunmüddətli davamlılığı və institusional gücləndirilməsi üçün ortaq fəaliyyət planlarının hazırlanacağını və gələcəkdə bu formatda mütəmadi görüşlərin keçiriləcəyini bildiriblər.