BAKI,AzerVoice, Fərid Mikayılov

İspaniyanın Barselona klubunun yenidənqurmadan sonra qismən istifadəyə verilən Kamp Nou stadionunda növbəti texniki problem qeydə alınıb.

AzerVoice xəbər verir ki, La Liqa çərçivəsində Real Oviedoya qarşı keçirilən qarşılaşma zamanı yağan güclü leysan nəticəsində stadionun media və şərhçi zonalarında ciddi sızıntılar baş verib.

Yağış sularının dam örtüyündən axaraq şərhçi mövqelərinə və media avadanlıqlarına düşməsi jurnalistlər və yayımçılar üçün iş şəraitini xeyli çətinləşdirib.

Oyun idman baxımından Barselona üçün uğurlu alınıb. Kataloniya təmsilçisi Dani Olmonun, Rafinianın və Lamin Yamalın qolları ilə Real Oviedo üzərində 3:0 hesablı qələbə qazanaraq turnir cədvəlində yenidən liderliyə yüksəlib.

Lakin qarşılaşmanın son dəqiqələrində başlayan intensiv yağış azarkeşlərin bir qisminin stadionu erkən tərk etməsinə səbəb olub. Media nümayəndələri isə leysan altında oyunu sona qədər işıqlandırmağa məcbur qalıblar. Sosial şəbəkələrdə yayılan görüntülərdə şərhçi masalarına və tribunaların bəzi hissələrinə su axdığı açıq şəkildə görünür.

Qeyd edək ki, Kamp Nou stadionu uzunmüddətli və bahalı yenidənqurma prosesindən sonra bir neçə ay əvvəl qismən açılıb. Layihə başa çatdıqdan sonra arenanın tutumunun 105 min yerə çatdırılması nəzərdə tutulur. Hazırda isə təhlükəsizlik və texniki səbəblərdən stadiona təxminən 45 min azarkeş buraxılır. Modernləşdirmə işlərinin 2026-cı ilin iyununda tamamlanması planlaşdırılır.