BAKI, AzerVoice, Nailə Babazadə

Beşiktaş, Leicester City-dən nigeriyalı yarımmüdafiəçi Wilfred Ndidi-ni 8 milyon avroya transfer etdiyini açıqlayıb.

AzerVoice xəbər verir ki, David Jurasek, Tammy Abraham və Orkun Kökçüdən sonra Beşiktaş daha bir transferdə istədiyinə nail olub.

Qara-ağlılar, orta xəttini nigeriyalı futbolçu Wilfred Ndidi ilə gücləndirdi.

Beşiktaş tərəfindən verilən açıqlamada bildirilib "Peşəkar futbolçu Wilfred Onyinye Ndidi-nin transferi ilə bağlı klubu və özü ilə razılıq əldə olunub. Leicester City Football Club Limited klubuna ümumi transfer haqqı olaraq 8.000.000 avro ödənəcəkdir."

İstanbula gəlişindən sonra klubun sosial media hesabında yayımlanan videoda danışan təcrübəli yarımmüdafiəçi "Həqiqətən möhtəşəm hissdir. Bu, Türkiyəyə ikinci gəlişimdir və özümü çox yaxşı hiss edirəm. Beşiktaş-a qoşulmaq mənim üçün böyük bir şeydir." - deyə qeyd edib.

Nigeriyalı futbolçu daha sonra tibbi müayinədən keçib.

Qeyd edək ki,Wilfred Ndidi 2014–15 mövsümündə Belçikanın Genk klubunda çıxış etməyə başlayıb.

Genk-dəki ikinci mövsümündə 43 oyunda iştirak edən nigeriyalı futbolçu 4 qol və 1 assistlə yadda qalıb. Belçikada keçirdiyi 3 mövsümdə ümumilikdə 83 oyuna çıxıb, 7 qol vurub və 1 məhsuldar ötürmə edib.

2017-ci ilin yanvarında İngiltərəyə yollanan Ndidi, Premyer Liqa təmsilçilərindən Leicester City-yə 17,5 milyon avroya transfer olunub.

Təcrübəli futbolçu Leicester City-də 9 mövsüm forma geyinib. Ötən mövsüm ada klubunda 30 oyunda iştirak edərək 1 qol və 5 assistlik töhfə verib. 9 mövsüm ərzində ümumilikdə 303 oyuna çıxıb, 18 qol vurub, 22 məhsuldar ötürmə verib.