BAKI,AzerVoice
İngiltərənin qadınlardan ibarət milli komandası 2025-ci il Avropa çempionatının qalibi olub.
AzerVoice xəbər verir ki, final qarşılaşması İsveçrənin Bazel şəhərində yerləşən “Sankt Yakob Park” stadionunda keçirilib.
Həlledici oyunda İngiltərə İspaniya yığmasına penalti seriyasında qalib gələrək çempionluğunu rəsmiləşdirib.
Oyunun baş hakimi fransalı Stefani Frappar olub. Oyun ərzində komandalar əsas və əlavə vaxtda hərəyə bir dəfə fərqlənib. İspaniya hesabı 25-ci dəqiqədə yarımmüdafiəçi Mariona Kaldente ilə açıb. İngiltərə isə 57-ci dəqiqədə hücumçu Alessia Russo ilə cavab verib.
Qarşılaşmanın qalibi penalti seriyasında müəyyən olunub. İngiltərə yığması burada üstünlüyü ələ alaraq 3:1 hesabı ilə qalib gəlib.
Beləliklə, İngiltərə qadınlardan ibarət yığma komanda Avropa çempionu titulunu qoruyaraq ardıcıl ikinci dəfə qitənin ən güclüsü adını qazanıb. Xatırladaq ki, İngiltərə 2022-ci ildə öz meydanında keçirilən finalda Almaniyanı əlavə vaxtda 2:1 hesabı ilə məğlub edib.