Bakı, AzerVoice

UEFA Çempionlar Liqasının 1/8 final mərhələsində keçirilən Madrid derbisində mərhələni keçən tərəf "Real Madrid" oldu.

AzerVoice xəbər verir ki, "Atletiko" evdə 2-1 hesabı ilə məğlub etdiyi əzəli rəqibinə səfərdə 1-0 uduzsa da, penaltilərə gedən matçdan qalib ayrıldı.

"Real Madrid" növbəti mərhələyə yüksələrkən, Atletico Madrid üçün isə bu mövsüm Avropa macərası başa çatıb. Lakin matçın penalti seriyasında Julian Alvarezin qeydə alınmayan zərbəsi mübahisələrə səbəb oldu.

"Atletiko"nun argentinalı ulduzu penalti zamanı topu qapıya göndərdi. Lakin qısa müddət sonra VAR müdaxiləsi gəldi. Alvarez penaltini yerinə yetirərkən topun digər ayağına da toxunduğu üçün vuruş etibarsız sayıldı.

Matçdan sonra "Atletiko Madrid"in baş məşqçisi Dieqo Simeone bu epizoda etirazını bildirdi.

"Daha əvvəl penaltilərdə VAR-ın müdaxilə etdiyini görməmişdim. Görüntülərə baxdım, qolu saymaq olar ya yox, mübahisəlidir. Julian penaltini yerinə yetirərkən top hərəkət etmirdi. Onların topa iki dəfə toxunduğunu gördüklərinə inanmaq istəyirəm," – deyə o qeyd edib.

"Real Madrid"in belçikalı qapıçısı Tibo Kurtua həmin epizodu ilk görən şəxs olduğunu və hakimi xəbərdar etdiyini bildirib.

"İki dəfə toxunduğunu hiss etdim və hakimin yanına gedib bunu dedim. Bunu görmək asan deyildi. Onlar üçün bədbəxt bir hal oldu," – deyə Kurtua qeyd edib.

"Real Madrid"in baş məşqçisi Karlo Ançelotti isə epizodla bağlı, "Mənə elə gəldi ki, topa sol ayağı ilə toxundu" deyə bildirib.