BAKI, AzerVoice

Paytaxt ərazisində müşahidə olunan şaxtalı hava şəraiti ilə əlaqədar yol hərəkətinin təhlükəsizliyinin təmin edilməsi məqsədilə bəzi magistral və əsas yollarda sürət məhdudiyyətləri tətbiq edilib.

AzerVoice xəbər verir ki, Daxili İşlər Nazirliyinin Nəqliyyatı İntellektual İdarəetmə Mərkəzinin yaydığı məlumata əsasən, hazırda Bakıda hökm sürən şaxtalı hava şəraiti səbəbindən Zığ dairəsi–Hava Limanı avtomobil yolunda maksimal sürət həddi 40 km/saatadək endirilib.

Bununla yanaşı, Heydər Əliyev prospekti–Mərdəkan–Zuğulba–Bilgəh istiqamətində yerləşən yollarda bütün hərəkət zolaqları üzrə sürət həddi 20 km/saat müəyyən olunub. Qeyd olunan yol sahələrində ümumi hərəkət sürəti isə 70 km/saat olaraq tənzimlənib.

Məlumatda bildirilib ki, tətbiq edilən məhdudiyyətlərlə bağlı Nəqliyyatı İntellektual İdarəetmə Mərkəzinin əməkdaşları tərəfindən məlumat-sürət tablolarında müvafiq dəyişikliklər edilib. Eyni zamanda, bütün elektron tablolar üzərində “sürüşkən yol” xəbərdaredici nişanı aktivləşdirilib.

Daxili İşlər Nazirliyi sürücüləri mövcud hava şəraitini nəzərə almağa, müəyyən edilmiş sürət həddinə ciddi riayət etməyə və yol hərəkəti qaydalarına əməl etməyə çağırır.