BAKI, AzerVoice, Nailə Babazadə
Türkiyə və Azərbaycan prezidentləri Rəcəb Tayyib Ərdoğan və İlham Əliyev arasında keçirilən görüşdən sonra, Türkiyənin Qarabağda məktəb inşa etməsi ilə bağlı razılıq əldə olunub. Bu barədə Türkiyənin milli təhsil naziri Yusuf Tekin məlumat verib.
AzerVoice xəbər verir ki, Tekin bildirib ki, məktəbin Ağdamda və ya uyğun hesab ediləcək digər bir ərazidə inşası planlaşdırılır.
Azərbaycanın Elm və Təhsil naziri Emin Əmrullayev isə türkiyəli həmkarını Qarabağda qəbul etməkdən məmnun olduğunu vurğulayıb.
“Azərbaycan ilə Türkiyə arasındakı dostluq və qardaşlıq münasibətləri təhsildə də ən sıx şəkildə davam edir.” - deyə Əmrullayev qeyd edib.
Görüş çərçivəsində Türkiyə və Azərbaycan arasında peşə və texniki təhsil sahəsində əməkdaşlığı nəzərdə tutan protokol da imzalanıb. Sənədi nazir Yusuf Tekin və Emin Əmrullayev imzalayıblar.
