BAKI, AzerVoice

Keyfiyyətə yönəldim, say azaldı, məmnuniyyət artdı .

Bunu AzerVoice-ə açıqlamasında tanınmış stilist Ayaz Este deyib. tanınmış stilist Ayaz Este geyim seçimində keyfiyyətin önəmini vurğulayıb.

Onun sözlərinə görə, geyim insanın zövqünü və statusunu göstərməklə yanaşı, həyat tərzinə, rahatlığına və uzunmüddətli xərclərinə də ciddi təsir edir. O qeyd edib ki, xüsusilə son illərdə sürətli moda (fast fashion) brendlərinin artması ilə bazarda keyfiyyətsiz geyim bolluğu müşahidə olunur ki, bu da həm istehlakçıya, həm də ətraf mühitə zərər verir.

Ayaz Este bildirib ki, keyfiyyətli geyimlə keyfiyyətsiz geyim arasında əsas fərqlər artıq ilk toxunuşdan hiss olunur: “Keyfiyyətli məhsullarda pambıq, yun, ipək və kətan kimi təbii materiallara üstünlük verilir. Bu parçalar dərinin nəfəs almasına imkan yaradır və istifadə zamanı maksimum rahatlıq təmin edir. Sintetik materiallar isə əksinə, istini saxlayır, tər ifrazını artırır və allergiyaya səbəb ola bilər.”

Stilist həmçinin əlavə edib ki, tikiliş keyfiyyəti də böyük rol oynayır. Onun fikrincə, keyfiyyətli geyimlərin tikiş xətləri düz, səliqəlidir, düymələri möhkəm bərkidilib və uzunmüddətli istifadə üçün nəzərdə tutulub: “Keyfiyyətsiz məhsullar bir neçə yuma sonrası formasını itirir, tikişləri açılır və tez dağılır.”

Ayaz Este geyimin ömrü və dayanıqlığına da toxunaraq qeyd edib ki, ucuz məhsulların cazibədar qiyməti əslində illik xərcləri artırır: “Keyfiyyətsiz geyimləri tez-tez dəyişmək lazım gəlir, amma keyfiyyətli məhsul illərlə öz formasını saxlayır və insanın həm vaxtına, həm də büdcəsinə qənaət edir.”

Stilist deyib ki, kəsim və formanın duruşu da vacib amillərdəndir: “Keyfiyyətli geyimlər insan bədən quruluşuna uyğun dizayn edildiyindən üzərimizdə daha estetik və səliqəli görünür. Bu isə həm görünüşə, həm də özünəinam hissinə təsir edir.”

Sonda Ayaz Este bildirib ki, keyfiyyətli geyim insana zövq, rahatlıq və dəyər hiss etdirir: “Keyfiyyətli geyim təkcə xarici görünüş deyil, həm də insanın özünə olan münasibətinin göstəricisidir. Az, amma yaxşı – bu prinsip hər zaman uğurlu nəticə verir.”