AzerVoice xəbər verir ki, ABŞ prezidentinin rəsmi təyyarəsi Vaşinqton yaxınlığında yerləşən Andrews birgə hərbi bazasına təhlükəsiz şəkildə eniş edib.
Ağ Evin mətbuat katibi Karolin Levitt jurnalistlərə açıqlamasında bildirib ki, uçuşdan az sonra təyyarədə elektrik sistemində kiçik texniki problem aşkarlanıb. Onun sözlərinə görə, təhlükəsizlik protokollarına uyğun olaraq uçuş dərhal dayandırılıb və təyyarənin geri qayıtmasına qərar verilib.
Levitt qeyd edib ki, nasazlıq aradan qaldırıldıqdan və ya alternativ təyyarə təmin edildikdən sonra ABŞ prezidenti Davosa səfərini davam etdirəcək. O, hadisənin Trampın forum çərçivəsində planlaşdırılan çıxış və görüşlərinə ciddi təsir göstərməyəcəyini vurğulayıb.
Qeyd edək ki, Dünya İqtisadi Forumu hər il Davosda keçirilir və dövlət və hökumət başçıları, iri şirkət rəhbərləri, beynəlxalq təşkilatların nümayəndələri üçün qlobal iqtisadi və siyasi gündəmin müzakirə edildiyi əsas platformalardan biri hesab olunur.