BAKI, AzerVoice
Monqolustanın Prezidenti Uxnaagiyn Xurelsux 20 iyul tarixində Qırğızıstana dövlət səfəri edəcək.
AzerVoice xəbər verir ki, bu barədə Qırğızıstan Prezident Administrasiyasının Xarici siyasət şöbəsinin müdiri Sağınbek Abdumutalip məlumat verib.
Rəsmi açıqlamaya əsasən, səfər çərçivəsində dövlət protokoluna uyğun olaraq rəsmi qarşılama mərasimi və yüksək səviyyəli görüşlər keçiriləcək.
Prezident Xurelsux Qırğızıstan Prezidenti Sadır Japarov, Joqorku Keneşin sədri Nurlanbek Turğunbek uulu və Nazirlər Kabinetinin sədri Adılbek Kasımaliyev ilə ikitərəfli danışıqlar aparacaq.
Səfər zamanı Qırğızıstan-Monqolustan əməkdaşlığının müxtəlif sahələrini əhatə edən bir sıra sənədlərin imzalanması nəzərdə tutulur.
Bununla yanaşı, dövlət səfəri çərçivəsində iki ölkə arasında biznes forumun keçirilməsi və Monqolustan ilə Qırğızıstanın incəsənət nümayəndələrinin iştirakı ilə mədəni tədbirin – konsert proqramının təşkili də planlaşdırılır.