BAKI, AzerVoice

Türk Mədəniyyəti və İrsi Fondu Azərbaycan Milli Konservatoriyası ilə birgə təşkilatın Bakıdakı mərkəzi qərargahında “Türk İrsi Dünya Səhnəsində” mövzusunda Dəyirmi Masa keçirib. Tədbir 1925-ci ildə Parisdə keçirilmiş Ümumdünya Müasir Dekorativ və Sənaye Sənətləri Beynəlxalq Sərgisində türk xalqlarının görkəmli mədəniyyət xadimlərinin təntənəli çıxışlarının 100 illiyinə həsr olunub.
AzerVoice xəbər verir ki, açılış nitqi ilə çıxış edən Fondun prezidenti Aktotı Raimkulova gələn qonaqları salamlayaraq qeyd edib ki, Türk dünyasının əlamətdar hadisəsi kimi qəbul edilən Parisdə keçirilmiş beynəlxalq sərgidə (1925) görkəmli mədəniyyət xadimlərinin parlaq çıxışının 100 illiyi tamam olur. Çıxışının davamında O, bir əsr sonra Azərbaycan, Qazaxıstan, Özbəkistan və Başqırdıstandan gəlmiş musiqişünasların Bakıda bir araya gəlməsinin əcdadların zəngin ənənələrinin yaşadıldığını, nəsilləri birləşdirərək Türk Dünyasına ilham verdiyini bildirib. Tədbirə qatılanları bu böyük missiyada iştirak etdikləri üçün təbrik edib, Dəyirmi Masanın işinə uğurlar arzulayıb.
Tədbirdə Azərbaycan Milli Konservatoriyasının rektoru Kamilə Dadaş-zadə, Qazax Milli Xoreoqrafiya Akademiyasının rektoru Bibigül Nusibcanova, Özbəkistan Mədəniyyət Nazirliyi yanında Qeyri-Maddi Mədəni İrs Elmi-Tədqiqat İnstitutunun direktor müavini İradə Dadacanova, Başqırdıstan Respublikasının tanınmış kurayçısı Artur Qaysarov və digər qonaqlar təbrik nitqləri ilə çıxış etdilər.
Elmi hissədə Azərbaycan Milli Konservatoriyasının elmi işlər üzrə prorektoru Lalə Hüseynova, Azərbaycan Respublikası Musiqi Mədəniyyəti Dövlət Muzeyinin direktoru, sənətşünas Alla Bayramova, Sənətşünaslıq üzrə elmlər doktoru, professor Ülkər Əliyeva, Azərbaycan Milli Konservatoriyası nəzdində “Səsin tədqiqi” elmi-tədqiqat laboratoriyasının rəhbəri, doktorant Aleksandriya Sultan fon Brüseldorf, T.Jurgenov adına Qazaxıstan Milli Rəssamlıq Akademiyasının Akademik məsələlər üzrə şöbə müdiri, sənətşünaslıq üzrə fəlsəfə doktoru, Abdrahmanova Gülnar, K.Bayseitova adına Qazax Milli İncəsənət Universitetinin musiqişünaslıq kafedrasının professoru, sənətşünaslıq üzrə fəlsəfə doktoru, Xanım Meruert Kurmanqaliyeva Şövkət Məmmədovanın böyük səhnəyə çıxışı, Amre Kaşaubayevin Parisdə qazandığı uğurlar, türk xalqlarının musiqi arxivləri və qadın sənətkarların irsi barədə məruzələrlə çıxış ediblər. Z.İsmaqilov adına Ufa Dövlət İncəsənət İnstitutunun ənənəvi musiqi ifaçılığı kafedrasının müdiri, Başqırdıstan Respublikasının Əməkdar Mədəniyyət İşçisi, pedaqoq, Başqırdıstan Respublikası Kurayçılar İttifaqının sədri Artur Qaysarovun təqdimatında Başqırd xalq melodiyaları “Ural” və “Bayık” da səsləndirilib.
Dəyirmi masa qəbul olunmuş qətnamə ilə yekunlaşıb.