BAKI, AzerVoice,Nailə Babazadə
Türkiyənin vitse-prezidenti Cevdet Yılmaz, Azərbaycan və Ermənistan arasında aparılan sülh danışıqları ilə bağlı açıqlama verib. O bildirib ki, ədalətli və qarşılıqlı hörmətə əsaslanan bir sülh mühiti bütün bölgə üçün müsbət nəticələr verəcək.
AzerVoice xəbər verir ki,sosial media hesabında açıqlama yayan Yılmaz, ABŞ Prezidenti Donald Trampın vasitəçiliyi ilə Azərbaycan və Ermənistanın Ağ Evdə birgə sülh bəyannaməsi imzalamasını məmnunluqla qarşıladıqlarını qeyd edib.
Yılmaz, bu prosesin davamlı və dayanıqlı sülhlə nəticələnməsini arzuladıqlarını bildirib.
Türkiyənin vitse-prezidenti bildirib ki, Azərbaycan və Ermənistan arasında əldə olunacaq sülh təkcə iki ölkə üçün deyil, bütövlükdə Cənubi Qafqaz regionu üçün sabitlik və rifah anlamına gələcək.
“Davamlı sülh, Türkiyənin Qafqazla, xüsusilə Orta Asiya ilə iqtisadi əlaqələrinə də töhfə verəcək. Ticarət, sərmayə, turizm, enerji, logistika və infrastruktur sahələrində yeni imkanlar yaranacaq. Bu həmçinin Azərbaycan və Ermənistanla yanaşı, Türkiyənin, xüsusilə Şərqi Anadolu bölgəsinin inkişafına da müsbət təsir edəcək,” – deyə Yılmaz vurğulayıb.
Yılmaz, Ermənistan Baş naziri Nikol Paşinyanın daxili siyasi təzyiqlərə baxmayaraq ölkəsi üçün sülhü müdafiə etdiyini və bunun təqdir olunmalı bir addım olduğunu söyləyib.
“Bu günə gəlinməsində göstərdiyi liderlik üçün Prezident İlham Əliyevə, kritik dönəmlərdə qardaş Azərbaycana verdiyi strateji dəstəyə görə Prezident Rəcəb Tayyib Ərdoğana təşəkkür edirik. Ədalətli sülhdən hər kəs faydalanacaq. Qarşılıqlı hörmətə və yaxşı qonşuluq prinsiplərinə əsaslanan bir mühit hər kəsin xeyrinə olacaq. Türkiyə olaraq Cənubi Qafqazda sülh, sabitlik və rifahı dəstəkləməyə davam edəcəyik,” – deyə Yılmaz qeyd edib