Bakı, AzerVoice

Azərbaycan və ABŞ arasındakı tərəfdaşlıq əlamətdar tərəqqiyə çatıb və dayanıqlı gələcəyin təməlini qoyub.

AzerVoice xəbər verir ki, bunu ABŞ-nin Azərbaycandakı səfiri Mark Libbi bu vəzifədə müddətinin başa çatması ilə əlaqədar sosial şəbəkə hesabında paylaşdığı vida mesajında bildirib.

“Biz iqtisadi rifahı yüksəltmişik. Tarixi 30 il əvvələ dayanan Əsrin Müqaviləsindən keçənilki COP29-a və ABŞ-nin Azərbaycanda kiçik biznesə, fermerlərə və qadın sahibkarlara davam etməkdə olan dəstəyinə kimi ABŞ-Azərbaycan tərəfdaşlığı əlamətdar tərəqqiyə çatıb və daha aydın və dayanıqlı gələcək üçün təməllər qoyub”, - deyə o bildirib.

Səfir qeyd edib ki, ABŞ Azərbaycanda mina təhdidləri ilə mübarizəyə əhəmiyyətli miqdarda resurslar yönəldib.

“Birlikdə biz Azərbaycan əhalisinin təhlükəsizliyini təkmilləşdirmişik. Səfirlik azərbaycanlıların həyatına hər gün təhlükə yaradan minaların təmizlənməsinə milyonlarla dollar ayırıb. Mən və həmkarlarım Azərbaycanın beynəlxalq səviyyədə tanınmış ərazilərinə rəsmi səfərlər etməklə ABŞ-nin ərazi bütövlüyü prinsipinə hörmətini göstərmişik”, - deyə amerikalı diplomat bildirib.

“Və son olaraq, insanlararası əlaqələrdə olduqca böyük inkişafın şahidi olmuşuq. Birləşmiş Ştatlarda təhsil alan azərbaycanlı tələbələrin sayının sürətli artımı, köçkünlər və digər az imkansız əhali qruplarına İngilis dilinin tədrisi proqramları vasitəsilə xalqlarımız arasındakı dostluğun davamlı olduğunu və inkişaf etdiyini sübuta yetirmişik.

Hər şeydən daha çox bu məndə münasibətlərimizin gələcəyinə dair böyük ümidlər doğurur. Ailəmi və məni qonaq etdiyiniz üçün sizə təşəkkür edirəm, Azərbaycan.Qonaqpərvərliyiniz və yaradıcılıq enerjiniz üçün sizə minnətdaram, Azərbaycan. Danusia və mən bu möhtəşəm ölkə üçün darıxacağıq. Qarşıdan gələn illərdə Azərbaycan xalqına səmimi qəlbdən xoşbəxtlik və rifah arzulayırıq”, - deyə səfir mesajını sona çatdırıb.