BAKI,AzerVoice
Özbəkistan Prezidenti Şavkat Mirziyoyev 24–25 iyun tarixlərində Monqolustana dövlət səfəri həyata keçirəcək.
AzerVoice xəbər verir ki, səfər Monqolustan Prezidenti Uxnaagiyn Xurelsuxun dəvəti əsasında baş tutur.
Səfər çərçivəsində paytaxt Ulan-Batorda iki ölkə rəhbərləri arasında yüksək səviyyəli danışıqların keçirilməsi planlaşdırılır.
Görüş zamanı Özbəkistan ilə Monqolustan arasında dostluq və praktiki əməkdaşlığın daha da inkişaf etdirilməsi məsələləri müzakirə olunacaq.
Tərəflər ticarət dövriyyəsinin artırılması, məhsul çeşidlərinin genişləndirilməsi, sənaye, kənd təsərrüfatı, mədənçilik, nəqliyyat və digər prioritet sahələrdə birgə layihələrin irəli aparılması və mədəni-humanitar əlaqələrin fəallaşdırılması üzərində fikir mübadiləsi aparacaqlar.
Sammitin yekununda bir sıra əməkdaşlıq sənədlərinin imzalanması gözlənilir.