BAKI, AzerVoice, Nailə Babazadə
Bu gün səhər saatlarında bir sıra ölkələrdə, o cümlədən Türkiyədə Google-un bəzi xidmətlərinə girişdə problemlər müşahidə olunub.
AzerVoice xəbər verir ki, Türkiyənin Nəqliyyat və İnfrastruktur nazirinin müavini Ömər Fatih Sayan məsələ ilə bağlı açıqlama verərək, kəsintinin Android və Google-a bağlı xidmətləri əhatə etdiyini bildirib.
“Google, Android və ona bağlı servislərdə Türkiyə və Avropa bölgəsini əhatə edən kəsinti yaşanır. Türkiyə Milli Kibertəhlükəsizlik Müdaxilə Mərkəzimiz (USOM) Google-dan problemin səbəbinə dair texniki hesabat tələb edib. Prosesi yaxından izləyirik,” – deyə Sayan qeyd edib.
Nazir müavini, yaşanan texniki problemin milli texnologiyaların və proqram təminatlarının əhəmiyyətini bir daha ortaya qoyduğunu bildirib.
“Bu səbəbdən həm 5G-nin proqram, həm də avadanlıq hissəsində yerlilik nisbətini artırmaq üçün ciddi işlər gördük. Hazırda 60% olan yerlilik səviyyəmizi daha da artıracağıq.” - deyə Sayan qeyd edib.
Qeyd edək ki,hadisənin səbəbi ilə bağlı Google tərəfindən hələlik rəsmi açıqlama verilməyib.
