BAKI, AzerVoice , Fərid Mikayılov
Avropa boyunca qatarla səyahət edən sərnişinlər üçün internetə çıxış hələ də əsas narazılıq mövzularından biridir. Qatar operatorları Wi-Fi xidmətini üstünlük kimi təqdim etsələr də, real vəziyyətdə zəif siqnal, səhifələrin gec yüklənməsi və onlayn video izləmək imkanının məhdudluğu geniş yayılıb.
Rabitə texnologiyaları üzrə analitik şirkət Ookla-nın eksperti Lyuk Keho bildirib ki, qatarların yüksək sürətlə hərəkəti mobil qüllələr arasında tez-tez keçid etməyə səbəb olur ki, bu da “Doppler effekti” ilə siqnal tezliyinin dəyişməsinə və əlaqənin qeyri-sabitliyinə gətirib çıxarır.
Bəzi qatar vaqonlarında istifadə olunan metal örtüklü və ya xüsusi şüşələr radio siqnallarının keçməsinə mane olur. Bu səbəbdən vaqonlar elektromaqnit dalğalarını bloklayan “Faraday qəfəsi”nə bənzəyir.
Belçikanın SNCB şirkəti yüksək quraşdırma xərclərinə görə Wi-Fi layihəsindən imtina edərək, əvəzində mobil siqnalların daha asan keçməsi üçün pəncərə örtüklərini dəyişdirməyə başlayıb. Şirkət hesab edir ki, dəmir yolu infrastrukturuna yaxın ərazilərdə siqnal keyfiyyətini artırmaq telekommunikasiya operatorlarının məsuliyyətidir.
Avropada 5G üçün ayrılmış tezlik diapazonları, xüsusilə dəmir yolu xətləri boyunca sıx ağaclıq olan ərazilərdə zəif işləyir. 4G siqnalları daha uzaq məsafəyə yayılsa da, ötürmə sürəti aşağı olur. Ookla-nın məlumatlarına görə, yay aylarında sıx bitki örtüyü olan ərazilərdə mobil şəbəkə performansı nəzərəçarpacaq dərəcədə pisləşir.
Qitə boyunca minlərlə tunelin mövcudluğu da internetin fasiləsiz işləməsini çətinləşdirir. İsveçrə isə bu sahədə ən yaxşı nəticə göstərərək 25 Mbit/san həddini keçən yeganə ölkə olub. Burada qatardakı internet sürəti Avstriya və Niderlanddakından təxminən 30 dəfə yüksəkdir.
Bəzi dəmir yolu operatorları internet keyfiyyətini artırmaq üçün peyk texnologiyasına üz tutur. Çexiya Dəmir Yolları Starlink şəbəkəsini sınaqdan keçirir, Fransa SNCF isə həm ABŞ, həm də Fransa–Britaniya istehsalı peyk sistemlərini nəzərdən keçirir.
Keho vurğulayıb ki, peyk rabitəsi əsas həll yolu olmasa da, mövcud infrastrukturun tamamlayıcısı ola bilər.
Ookla-nın Polşada topladığı məlumatlar göstərir ki, bəzi qatarlar hələ də 2009-cu il standartı olan Wi-Fi 4-dən istifadə edir. Bu isə daha aşağı bant genişliyi və sürət deməkdir.