BAKI, AzerVoice
SpaceX-in Texasdakı Starbase sınaq sahəsində “Starship”
proqramının yeni mərhələsi yenidən daha bir uğursuzluqla
nəticələnib.
AzerVoice xəbər verir ki, “Gəmi 36”
nömrəli üst pillə raketi sabit atəş sınağı zamanı güclü partlayışla
tamamilə məhv olub.
SpaceX hadisəni “böyük bir anomaliya” kimi qiymətləndirib.
Partlayış raket supersoyuq metan və maye oksigenlə doldurularkən baş verib. Sakinlər hadisəni 50 kilometr uzaqlıqda hiss ediblər. Elon Musk ilkin səbəb kimi faydalı yük bölməsindəki yüksək təzyiqli azot çəninin sıradan çıxmasını göstərib. Bu növ çənlər daha əvvəl “Falcon 9” raketlərində də partlayışlara səbəb olmuşdu.
SpaceX-in sınaqları aparmaq üçün istifadə etdiyi yeganə Massey Test Sahəsi də ciddi zərər görüb. FAA-nın iyunun 29-u üçün planlaşdırdığı növbəti uçuş tarixi hazırda sual altındadır.
Qeyd edək ki, bu partlayış SpaceX-in son 3 uğursuz Starship sınağından sonra baş verib. Həm yanvar, həm mart, həm də may aylarında reallaşan uçuşlar idarəetmə problemləri və texniki nasazlıqlar səbəbindən uğursuz nəticələnmişdi.
SpaceX ilin sonuna qədər daha inkişaf etmiş Raptor mühərrikləri ilə təchiz olunmuş “Starship Version 3” modelini buraxmağı planlaşdırır. Bu versiya NASA-nın 2027-ci il üçün planlaşdırdığı Artemis III Ay missiyası da daxil olmaqla, Marsa və orbitə yanacaq daşıyan missiyalara hazır olmalıdır. Ancaq indiki texniki və struktur problemlər bu hədəfləri ciddi riskə atır.